Xitoyning Usi shahrida bo‘lib o‘tgan “Wuxi 2025 World Taekwondo Grand Slam Challenge” musobaqasi dunyoning eng kuchli taekvondochilarini bir maydonga jamladi. Unda 50 dan ortiq mamlakat vakillari jahon reyting ochkolari hamda katta musobaqalarga yo‘llanma uchun bellashdilar.
O‘zbekiston sharafini mazkur nufuzli turnirda milliy terma jamoa a’zosi Shabbona Abduvaliyeva (57 kg vazn toifasi) himoya qildi. U barcha raqiblarini ortda qoldirib, finalgacha yetib bordi va hal qiluvchi bellashuvda juda kuchli taekvondochi bilan kurash olib bordi.
Qat’iyatli va jangovor ruhda kechgan finalda hamyurtimiz so‘nggi daqiqalargacha g‘alaba uchun harakat qildi. Ammo tajribali raqib bir oz ustunlik qilib, g‘alabani qo‘lga kiritdi. Shunga qaramay, Shabbona Abduvaliyeva musobaqani kumush medal bilan yakunladi va shohsupaning ikkinchi pog‘onasidan joy oldi.
Bu natija nafaqat shaxsiy yutuq, balki milliy terma jamoa uchun ham muhim ahamiyatga ega bo‘ldi. Sababi, ushbu medal natijasida Abduvaliyeva 2026-yilda o‘tkaziladigan Katta dubulg‘a turnirida ishtirok etish huquqini qo‘lga kiritdi.
O‘zbekiston taekvondo WT assotsiatsiyasi ma’lumotlariga ko‘ra, bu musobaqa sportchilar uchun kelgusi olimpiya va jahon musobaqalariga tayyorgarlikning muhim bosqichi hisoblanadi.
Shabbona Abduvaliyeva bu natijasi bilan yana bir bor o‘z salohiyati va mahoratini namoyish etdi. Uning so‘zlariga ko‘ra, oldinda unda yanada katta rejalar va g‘alabalar bor. “Maqsadimiz – kelgusi musobaqalarda Vatan bayrog‘ini yana baland ko‘tarish”, — degan u musobaqadan so‘nggi intervyusida.
O‘zbek muxlislari esa yosh taekvondochidan 2026-yildagi Katta dubulg‘a musobaqasida yangi zafarlar kutmoqda.
“Zamin”ni Telegramʻda oʻqing!
