“Barselona” bosh murabbiyi Xans-Diter Flik Chempionlar ligasi guruh bosqichining toʻrtinchi turida “Bryugge” bilan durang (3:3) oʻynagan oʻyindan soʻng oʻz fikrlarini bildirdi. Kataloniyaliklar Belgiya safarida uch marta hisobda ortda qolgan boʻlsalar-da, magʻlubiyatdan qochishga muvaffaq boʻlishdi.
"Bu oson oʻyin boʻlmadi. Bizda koʻplab imkoniyatlar boʻldi, ammo "Bryugge" yaxshi himoyalandi va juda agressiv oʻynadi.
Biz pressingda zaifroq edik va ayniqsa yarim himoyada koʻplab yakkakurashlarni yutqazdik. Himoyachilarimizga qiyin boʻldi.
Toʻpsiz oʻyindagi intensivlik ustida ishlashimiz kerak – raqib bir-ikki pas bilan qarshi hujumga oʻtganida hushyor boʻlish muhim. Faqat darvoza yonida emas, balki maydon markazida ham yaxshi himoyalanishimiz lozim", – dedi Flik UEFA matbuot xizmati orqali.
“Barselona” hozirda turnir jadvalida 7 ochko bilan 11-oʻrinni egallab turibdi.
