Ispaniya chempionatidagi yosh iqtidorlar orasida eng ko‘p muhokama qilinayotgan nomlardan biri — “Levante” hujumchisi Karl Eduard Etta Eyong. Kamerunlik futbolchi joriy mavsumdagi samarador o‘yini bilan nafaqat muxlislar, balki Yevropaning yetakchi klublarini ham hayratda qoldirdi.
22 yoshli to‘purar La Liganing deyarli har bir turida o‘z nomini tabloga yozdira olyapti. Uning tezkorligi, pozitsiya tanlashdagi ziyrakligi va raqib himoyachilari uchun doimiy xavf tug‘diradigan harakatlari uni transfer bozorining yangi "oltin bolasi"ga aylantirdi.
Mundo Deportivo nashrining ma’lumoticha, Eyong bilan “Real Madrid” va “Barselona” jiddiy qiziqish bildirgan. Har ikki klub uni yozda jamoasiga qo‘shib olish imkonini ko‘rib chiqmoqda. “Real”da uni kelajakda Vinisius yoki Rodrigoni orqada qoldiradigan hujumchi sifatida ko‘rishmoqda, “Barselona” esa uni tezkor qayta qurish jarayonidagi yangi markaziy figura sifatida baholamoqda.
Faqat Ispaniya emas — Angliya Premer-ligasining grandlari ham harakatda. “Manchester Siti”, “Manchester Yunayted” va “Arsenal” skautlari bir necha haftadan beri Eyongning har bir o‘yinini tahlil qilmoqda. Xususan, “Siti” murabbiyi Pep Gvardiola uning universal hujumdagi imkoniyatlarini yuqori baholagan.
Barcha klublar futbolchini allaqachon qishki oylarda transfer qilishga tayyorlanmoqda. Biroq Eyongning o‘zi shoshilmoqchi emas. Manbalarga ko‘ra, u mavsumni “Levante” bilan oxirigacha o‘tkazish va keyinchalik — 2026 yilgi jahon chempionatidan so‘ng katta klubga o‘tish niyatida.
Transfermarkt portali hozircha uning bozor qiymatini 20 million yevroga baholamoqda. Biroq ekspertlar bu raqam mavsum oxiriga qadar kamida ikki yoki uch baravar oshishi mumkinligini ta’kidlamoqda. Chunki agar Eyong shunday tempda to‘purarlik mahoratini davom ettirsa, u Yevropadagi eng talabgir hujumchilardan biriga aylanishi turgan gap.
“Levante” murabbiyi ham yosh futbolchining o‘sishi bilan faxrlanishini yashirmayapti: “Karl hozir faqatgina gol urmayapti, u butun jamoa uchun ruhiy yetakchiga aylandi. Biz uning katta kelajakka ega ekanini yaxshi bilamiz”, — dedi murabbiy so‘nggi matbuot anjumanida.
Ko‘rinadiki, Eyongning nomi yaqin oylarda transfer sarlavhalaridan tushmaydi. Uning keyingi manzili “Bernabeu”, “Kamp Nou” yoki “Etixad” bo‘ladimi — buni vaqt ko‘rsatadi. Bir narsa aniq: Ispaniya chempionatida yangi yulduz porlab chiqdi.
“Zamin”ni Telegramʻda oʻqing!
