APLning eng kutilgan bahslaridan biri — “Liverpul” va “Manchester Siti” o‘rtasidagi uchrashuv arafasida qizg‘in muhit hukm surmoqda. “Qizillar” bosh murabbiyi Arne Slot jurnalistlar bilan suhbatda o‘z fikrlari bilan o‘rtoqlashdi.
Ta’kidlanishicha, Slot uchun bu o‘yin “Liverpul”dagi eng muhim sinovlardan biri bo‘ladi. Gollandiyalik mutaxassis APLdagi ilk mavsumidayoq muxlislar ishonchi va mehrini qozona oldi.
“Men uchun bu juda qiziqarli va hissiyotlarga boy bahs bo‘ladi. APLda hali uzoq vaqt ishlamagan bo‘lsam-da, ‘Liverpul’ va ‘Manchester Siti’ o‘yinining qay darajada muhim ekanini har doim bilganman. Ilgari bu uchrashuvlarni televizor orqali tomosha qilardim, hozir esa unda bevosita ishtirok etaman. Bu — har bir murabbiy uchun katta sharaf”, — dedi Slot.
Uning so‘zlariga ko‘ra, bunday o‘yinlarda har bir daqiqa muhim ahamiyatga ega:
“Bu jamoalar o‘rtasidagi bellashuvlar deyarli har doim yuqori darajada kechadi. Har ikki tomon ham g‘alaba uchun o‘ynaydi, hech kim ehtiyotkorlikka berilib qolmaydi. Shu sababli bu bahslar muxlislar uchun ham, futbolchilar uchun ham bayramga aylanadi”.
Slot Pep Gvardiola rahbarlik qilayotgan “Manchester Siti” jamoasi haqida ham alohida to‘xtalib o‘tdi:
“Men Pepning jamoalari haqidagi eng yaxshi narsani ayta olaman — ular doimo haqiqiy futbol namoyish etadi. Ularda ortiqcha vaqt cho‘zish, o‘yinni buzish yoki faol harakatni to‘xtatish yo‘q. Ular har doim sifatli va mazmunli futbol ko‘rsatishga intilishadi. Men uchun futbol shunday bo‘lishi kerak — jonli, pok va o‘yin ruhiga to‘la”.
Gvardiolaning “Siti”si so‘nggi yillarda APLda doimiy yetakchi bo‘lib kelayotgan bo‘lsa, “Liverpul” esa Slot rahbarligida yangi energiyaga ega bo‘ldi. Mutlaqo yangi uslub va katta ishonch hissi jamoani qaytadan yuqori pog‘onaga olib chiqmoqda.
“Biz hozir faqat raqib haqida emas, balki o‘z o‘yinimiz haqida ham o‘ylashimiz kerak. Har bir futbolchi o‘z salohiyatini ko‘rsatsa, biz raqobatbardosh bo‘la olamiz. Men jamoamga ishonaman”, — dedi Slot suhbat yakunida.
Bu bellashuv nafaqat APL jadvali uchun, balki ikki klubning ruhiy ustunligi uchun ham muhim ahamiyat kasb etadi. “Enfild”dagi shiddatli bahs butun dunyo futboli muxlislari diqqat markazida bo‘ladi.
“Zamin”ni Telegramʻda oʻqing!
