“Siti” va “Liverpul” o‘rtasidagi ulkan to‘qnashuv: Gvardiolaning 1000-o‘yini
Angliya Premer-ligasining 11-turida jonli afsonaga aylangan ikki jamoa — amaldagi chempion “Liverpul” va so‘nggi yillarda eng barqaror tarzda o‘sib kelayotgan “Manchester Siti” o‘zaro kuch sinashadi.
Bu uchrashuv Xosep Gvardiola uchun faoliyatidagi muhim bosqichni ifodalaydi — u bosh murabbiy sifatida o‘zining 1000-uchrashuvini o‘tkazadi. Ispaniyalik mutaxassis buni tasodif emas, taqdirning in’omi, deb ta’riflamoqda.
“Liverpul” — eng munosib raqib
“Agar bu natijaga yetib kelganimda raqibni tanlash imkonim bo‘lganida, shubhasiz “Liverpul”ni tanlardim”, — deydi Pep Gvardiola.
Uning fikricha, so‘nggi yillarda aynan “qizillar” va Arne Slot bilan bo‘lgan raqobat Angliya futbolida yangi bosqich yaratgan.
“Barselona” mening hayotimda muhim rol o‘ynagan. U yerda men bolalik orzularimni ro‘yobga chiqarganman — futbolchi ham, murabbiy ham bo‘lganman. “Bavariya”da esa jahon futboli haqidagi bilimlarimni yanada boyitdim. Ammo Angliyadagi ish faoliyatimning markazida — “Liverpul” bilan kurash turdi”, — deya qo‘shimcha qildi Pep.
Chempionlik o‘yinidek bahs
Ekspertlar bu to‘qnashuvni mavsum taqdirini hal qilishi mumkin bo‘lgan bahs sifatida ko‘rishmoqda. “Etixad” stadionidagi o‘yin nafaqat ochkolar uchun, balki or-nomus va futbol uslubi uchun kurash bo‘ladi.
O‘tgan mavsumda “Liverpul” “Manchester Siti”ning rekordiga — ketma-ket to‘rt yillik chempionlik yurishiga chek qo‘ygan edi. Shu bois “shaharliklar” bu gal maydonga nafaqat g‘alaba, balki revansh ruhida chiqishmoqda.
Abduqodir Husanov masalasi
O‘z navbatida, o‘zbekistonlik muxlislar uchun bu o‘yinning yana bir qiziq jihati — Abduqodir Husanovning ehtimoliy maydonga tushishi.
Yosh himoyachi sentyabr oyida olgan jarohatidan sog‘ayib, yaqinda safga qaytdi. U “Suonsi Siti”ga qarshi Liga Kubogi bahsida boshlang‘ich tarkibda maydonga tushgan edi.
Gvardiola “Bornmut”ga qarshi uchrashuvda unga dam berdi, ammo Yevropa Chempionlar Ligasidagi “Borussiya Dortmund” bahsi qaydnomasiga Husanovni qayta kiritdi. Ayrim mutaxassislar bu qaror ortida “Liverpul”ga qarshi o‘yinga puxta tayyorgarlik borligini ta’kidlamoqda.
Yilning markaziy bahsi
“Manchester Siti” va “Liverpul” o‘rtasidagi markaziy to‘qnashuv 9-noyabr kuni, Toshkent vaqti bilan soat 21:30 da start oladi.
Bu faqat 11-tur bahsi emas — bu ikki jamoa o‘rtasidagi yangi bosqichni belgilaydigan katta sinov bo‘ladi. Futbol muxlislari bu kechani uzoq vaqt eslab yurishlari turgan gap.
“Zamin”ni Telegramʻda oʻqing!
