Qatarda bo‘lib o‘tayotgan FIFA U-17 Jahon chempionati qizg‘in davom etmoqda. Ayni paytda Islombek Ismoilov boshchiligidagi O‘zbekiston yoshlar terma jamoasi 2-turdan so‘ng “J” guruhida ikkinchi o‘rinni egallab, pley-off bosqichiga chiqish uchun jiddiy kurash olib bormoqda, deb xabar berdi O‘zbekiston futbol assotsiatsiyasi (O‘FA).
Turnir jarayonida O‘FA birinchi vitse-prezidenti Ravshan Irmatov jamoa a’zolari bilan uchrashuv o‘tkazdi. Ushbu muloqotda o‘yinchilarning jismoniy holati, ruhiy tayyorgarligi, turnirdagi ishtiroki va ularga yaratilgan sharoitlar batafsil muhokama qilindi.
Irmatov so‘z boshida jamoa a’zolariga ishonch bildirdi hamda ularning mamlakat sharafini munosib himoya qilayotganini ta’kidladi:
“Sizlar millionlab futbol muxlislarining umidi va iftixorisizlar. O‘zbekistonda hamma sizlarga ishonadi. Osiyo kubogida qanday fidoyilik ko‘rsatgan bo‘lsangizlar, bu musobaqada ham shunday kurashchanlik namoyon etinglar”, — dedi u.
Uchrashuv davomida jamoaning umumiy tayyorgarlik jarayoni haqida ham so‘z bordi. Islombek Ismoilov jamoa tarkibidagi barcha futbolchilar yuqori kayfiyatda ekanini, musobaqa muhitini his qilib turishini ma’lum qildi. Uning ta’kidlashicha, futbolchilar nafaqat natija, balki mamlakat sharafi uchun bor kuchini bermoqda.
Murabbiylar shtabi bilan jamoaning so‘nggi ikki turdagi o‘yinlari tahlil qilindi, kelgusi bahslarga tayyorgarlik rejasi ko‘rib chiqildi. Irmatov ularga professional yondashuv, intizom va jamoaviy ruhni saqlab qolish muhimligini uqtirdi.
Uchrashuvda tibbiy shtab a’zolari ham ishtirok etib, o‘yinchilarning sog‘lig‘i va tiklanish jarayoni bo‘yicha ma’lumot berdi. Shu munosabat bilan Ravshan Irmatov futbolchilarning vitamin balansi, dam olish va tiklanish jarayonlariga jiddiy e’tibor qaratishni tavsiya qildi. U barcha sharoitlar futbolchilarning maksimal imkoniyat bilan maydonga chiqishi uchun yaratilishi lozimligini ta’kidladi.
Musobaqadagi ishtirok davomida O‘FA mutasaddilari jamoa a’zolari bilan doimiy aloqada bo‘lib, ularni qo‘llab-quvvatlab kelmoqda. Irmatovning ta’kidlashicha, jamoaning bu bosqichdagi har bir o‘yini mamlakat futbolining kelajagiga ta’sir ko‘rsatadi va yoshlar uchun katta tajriba maktabi bo‘ladi.
Uchrashuv oxirida Ravshan Irmatov terma jamoa a’zolariga omad tilab, ularni g‘alabaga undadi:
“Sizlar bugun nafaqat o‘zingizni, balki butun mamlakatni namoyon etyapsizlar. Har bir o‘yinda ruh va iftixor bilan harakat qilinglar. O‘zbekistonning yoshlari sizlar orqali futbolning yangi sahifasini yozishiga ishonaman”, — dedi u.
Shunday qilib, O‘zbekiston U-17 terma jamoasi nafaqat chempionatdagi ishtirok, balki uyushqoqlik va jamoaviy ruhi bilan ham muxlislar qalbidan joy olmoqda. Endi barcha nazarlar keyingi bahslardagi natijalarga qaratilgan — chunki bu yosh terma jamoa haqiqatan ham kelajak umidi hisoblanadi.
“Zamin”ni Telegramʻda oʻqing!
