Matbuotda Krishtianu Ronaldu Tojikistonga, Osiyo Chempionlar Ligasi 2 bosqichi doirasida "Istiqlol" jamoasiga qarshi oʻyin uchun uchib bormaganligi haqida xabarlar paydo boʻldi. Ushbu maʼlumot haqiqatga zid va yolgʻon ekanligi maʼlum qilindi.
Gap shundaki, Ronaldu bosh murabbiy Jorge Jezush bilan maslahatlashgan holda, Osiyo Chempionlar Ligasi 2 bosqichining guruh oʻyinlarida ishtirok etmaslikka qaror qilgan edi. Sentyabr oyida oʻtkazilgan matbuot anjumanida Jezush bu qarorni tasdiqlab, 40 yoshli futbolchi salomatligini eʼtiborga olgan holda bunday qarorga kelinganligini tushuntirgan edi.
"Al-Nasr" jamoasining Osiyo Chempionlar Ligasi 2 bosqichidagi avvalgi toʻrtta oʻyinida ham Ronaldu maydonga tushmagan. Shunday ekan, futbolchining beshinchi oʻyinga uchib borishdan bosh tortgani haqidagi xabarlar haqiqatdan yiroq.
Maʼlumot uchun, Osiyo Chempionlar Ligasi 2 – bu Osiyodagi ikkinchi darajali klublar oʻrtasidagi musobaqa hisoblanadi. Krishtianu Ronalduning "Al-Nasr" bilan amaldagi shartnomasi 2027-yil oʻrtalariga qadar tuzilgan.
Mehmon guruhidagi foydalanuvchilar ushbu nashrga izoh qoldira olmaydi.
