“Manchester Siti” bosh murabbiyi Xosep Gvardiola Premer-ligadagi “Lids”ga qarshi o‘yindan keyin Erling Xoland bilan bo‘lgan samimiy va biroz hissiy muloqot haqida jurnalistlarga batafsil to‘xtaldi.
Hammaning e’tibori aynan bir nuqtada edi — Xolandning Angliya chempionatidagi 100-golini kutish. Bir gol — shunchaki raqam emas, balki Premer-ligada eng tez 100 ta to‘p urgan futbolchi sifatida yangi tarix yozish imkoniyati. Ammo norvegiyalik hujumchi bu bahsda raqib darvozasini ishg‘ol qila olmadi.
Gvardiola vaziyatga kengroq baho berdi:
— Erling shunchaki bu marrani zabt etadi. Kelasi uchrashuvda 100-to‘pini kiritishiga ishonaman. Biz u bilan dam olish, tiklanish va jismoniy holat haqida suhbatlashdik. Uning tanasi juda ulkan, shu bois to‘liq tiklanish unga boshqa futbolchilarga nisbatan ko‘proq vaqt talab etadi. Dam olish faqat oyoqlarda emas, boshda ham, — dedi murabbiy.
Murabbiyning ta’kidlashicha, Xolandning organizmi Fil Foden yoki Jeremi Dokuikidan farq qiladi, tez tiklanmaydi. Ularda tiklanish jarayoni tezroq kechadi. Erling esa, barvasta yigit. Shunga qaramay, barcha ishonadi — u “Siti”ning keyingi muhim uchrashuvlarida yana yarq etib, muhim gollar bilan jamoaga foyda keltiradi.
Hujumchining joriy mavsum statistikasi ham boshqacha gapirmoqda: 22 o‘yin — 22 gol va 2 golli pas.
Gvardiola fikriga ko‘ra, Erlingning sog‘lom qolishi va to‘liq tiklanishi klub uchun juda muhim. Chunki “Siti”ning gol mashinasi to‘laqonli formaga qaytsa, raqiblar uchun yana qo‘rqinchli kunlar boshlanadi.
Muxlislar esa endi bir narsani biladi: Xolandning 100-goli masala emas — vaqt masalasi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
