Sport arbitraj sudi (CAS) ning g‘alabasi
Sport arbitraj sudi (CAS) Xalqaro chang‘i sporti va snoubord bo‘yicha federatsiya (FIS) ga qarshi shikoyat arizasini kiritgan rossiyalik va belaruslik sportchilar da’volarini qisman qanoatlantirdi. Bungacha FIS qaroriga ko‘ra, ular 2026-yil Italiyada bo‘lib o‘tadigan qishki Olimpiya o‘yinlarida qatnashishga ruxsat berilmagan edi.
Lozannada 2-dekabrda qabul qilingan qarorga ko‘ra, Xalqaro olimpiya qo‘mitasi (XOQ) mezonlariga javob beradigan sportchilar qishki Olimpiada oldidan FIS saralash musobaqalarida, shuningdek boshqa xalqaro musobaqalarda neytral maqomda ishtirok etishi mumkin bo‘ladi. Paralimpiyachilarga ham FIS musobaqalarida boshqa davlat sportchilari bilan teng sharoitlarda ishtirok etishga ruxsat berildi.
CAS o‘z qarorida FIS ustavi sportchilarni kamsitishdan himoya qilishini va tashkilotdan siyosiy neytrallikni talab qilishini asos qilib oldi.
Rossiyaning rasmiy reaksiyasi
«Rossiya CAS’da FIS’ga qarshi da’voni yutib chiqdi. Endi FIS Rossiya sportchilarini xalqaro musobaqalarga qo‘yishi shart», — deb yozdi Rossiya sport vaziri va Rossiya Olimpiya qo‘mitasi rahbari Mixail Degtyaryov ushbu qarorga izoh berar ekan.
Eslatib o‘tamiz, FIS kengashi 21-oktyabrda Milan va Kortina-d’Ampetssoda bo‘lib o‘tadigan o‘yinlar uchun saralashda ishtirok etish imkoniyatisiz qoldirgan edi. Shundan so‘ng 17 nafar sportchi mazkur qarorga qarshi shikoyat arizasini kiritib, u FIS ustavidagi siyosiy neytrallik va kamsitishga yo‘l qo‘ymaslik qoidalarini buzayotganligini ta’kidlagan.
XOQ pozitsiyasi va kelgusi o‘yinlar
XOQ Ukrainaga qarshi keng ko‘lamli harbiy harakatlar sababli Rossiya va Belarusni Olimpiya o‘yinlarida qatnashish huquqidan mahrum etgan bo‘lsa-da, 2024-yil Parijdagi yozgi o‘yinlarda rossiyalik sportchilar yakka tartibda qatnashgan. XOQ ular uchun ham (qishki o‘yinlar) xuddi shunday imkoniyatni taqdim etmoqda. Neytral maqomdagi sportchilarni Olimpiadaga saralash musobaqalariga qo‘yish va ularni o‘tkazish xalqaro sport federatsiyalarining zimmasiga yuklatilgan. Qishki Olimpiya o‘yinlari 2026-yil 6–22 fevral kunlari Italiyada bo‘lib o‘tadi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
