Jahon chempionati 2026 qurʼasi: Messi va Ronaldu kimga qarshi oʻynaydi?

Jahon chempionati 2026 yilgi final bosqichi uchun qurʻa tashlash jarayoni juma kuni, 5-dekabr kuni boʻlib oʻtadi. Tadbir AQShning Vashington shahridagi “Kennedi markazi”da oʻtkaziladi va Toshkent vaqti bilan soat 22:00 da boshlanadi.

Qurʻani real vaqt rejimida kuzatish uchun LiveResult platformasi matnli translyatsiya olib boradi. Bu yilgi chempionat tarixda birinchi marta 48ta terma jamoa ishtirokida oʻtkaziladi.

AQSh, Kanada va Meksika terma jamoalari musobaqa mezboni sifatida avtomatik yoʻllanmalarga ega boʻlishdi. Hozirga kelib yana 39 jamoa saralash bosqichlarida oʻz oʻrnini taʼminladi.

Qolgan 6 yoʻllanma mart oyida boʻlib oʻtadigan qitʼalararo pley-off va UEFA zonasi oʻyinlari orqali aniqlanadi. Jamoalar qurʻa uchun toʻrt savatga boʻlingan.

Birinchi savatda musobaqa mezbonlari – AQSh, Kanada va Meksika joylashgan. Qolgan jamoalar FIFAning 2025 yil noyabr holatidagi reytingiga koʻra joylashtirilgan.

Toʻrtinchi savatning yarmi hali oʻz oʻrnini taʼminlamagan jamoalardan iborat. Toʻrtinchi savatda quyidagilar bor: - UEFA yoʻnalishi A gʻolibi (Uels yoki Bosniya va Gersegovina – Italiya yoki Shimoliy Irlandiya); - UEFA yoʻnalishi B gʻolibi (Ukraina yoki Shvetsiya – Polsha yoki Albaniya); - UEFA yoʻnalishi C gʻolibi (Slovakiya yoki Kosovo – Turkiya yoki Ruminiya); - UEFA yoʻnalishi D gʻolibi (Daniya yoki Shimoliy Makedoniya – Chexiya yoki Irlandiya); - Qitʼalararo yoʻnalish 1 gʻolibi (Yangi Kaledoniya yoki Yamayka – Kongo DR); - Qitʼalararo yoʻnalish 2 gʻolibi (Boliviya yoki Surinam – Iroq).

Qurʻa tashlash jarayonida guruhlar quyidagi tartibda tashkil etiladi. Mezbon davlatlarning oʻrni allaqachon maʼlum: Meksika A guruhida, Kanada B guruhida, AQSh esa D guruhida oʻynaydi.

Jamoalar savatlardan birin-ketin tortilib, guruhlarga joylashtiriladi. FIFA chempionat guruhlarini shakllantirishda qoidalarga rioya qiladi: 1) Bir guruhda bir xil konfederatsiyaga mansub ikki yoki undan ortiq jamoa boʻlmasligi kerak (UEFA bundan mustasno); 2) Har bir guruhda UEFAdan kamida bir va koʻpi bilan ikki jamoa boʻlishi lozim; 3) FIFA reytingining birinchi va ikkinchi oʻrinlarini egallagan Ispaniya va Argentina jamoalari turnir tarmogʻining turli qismlariga joylashtiriladi, shuningdek, uchinchi va toʻrtinchi oʻrin egalari Fransiya va Angliya ham shunday tartibda boʻladi.

Qurʻa natijalariga katta qiziqish bildirilmoqda. Jahon chempioni Argentina jamoasi kimlarga qarshi oʻynashi maʼlum boʻladi.

Shu bilan birga, Portugaliya jamoasi va 41 yoshida mundialda soʻnggi marta qatnashadigan Krishtianu Ronaldu ham diqqat markazida boʻladi. Germaniya jamoasi esa oldingi ikki mundialda guruhdan chiqa olmagan edi.

Bu safar Bundenstimg yaxshi tayyorgarlik koʻrib, pley-offga chiqish niyatida. Tadbirni Angliya terma jamoasining sobiq futbolchisi Rio Ferdinand olib boradi.

Unga taniqli boshlovchi Samanta Jonson va sport olamining yulduzlari Tom Breydi, Ueyn Gretski, Aaron Djadj va Shakil OʻNil yordam beradi. Maxsus mehmon sifatida Eli Menning ishtirok etishi kutilmoqda.

Jahon chempionati oʻyinlari 2026 yil 11-iyundan 19-iyulgacha boʻlib oʻtadi. Final uchrashuvi AQShning “Metlayf” stadionida oʻtkaziladi.

“Zamin”ni Telegramʻda oʻqing!