Shaxmat olamida e’tiborlar yana bir nufuzli musobaqaga, “Freestyle Chess Grand Slam Tour 2025” turnirining Keyptaunda bo‘lib o‘tadigan bosqichiga qaratilmoqda. 5–12-dekabr kunlari JARning ushbu afsonaviy shahride bo‘lib o‘tadigan turnir bu yilgi eng muhim intellektual voqeliklardan biri sifatida qayd etilyapti.
660 ming dollarlik umumiy mukofot jamg‘armasiga ega bo‘lgan musobaqada dunyoning eng kuchli 8 nafar grossmeysteri ishtirok etadi. Turnir aynan aylanma va nokaut tizimi uyg‘unlashgan formatda o‘tkazilishi bilan ham alohida ahamiyat kasb etadi — har bir duelda dinamika, strategiya va o‘tkir kombinatsiyalar tamomila boshqacha tus oladi.
Qatnashuvchilar ro‘yxati shaxmat olamidagi eng dovrug‘li nomlardan iborat: Norvegiya yulduzi Magnus Karlsen, AQSHning tajribali grossmeysteri Fabiano Karuana, Germaniya umidi Vinsent Keymer, Hindistonning tezkor o‘sib kelayotgan yosh iste’dodi Arjun Erigaisi, ikki karra olimpiada chempioni Levon Aronyan, AQSH nomidan ishtirok etayotgan Hans Moke Niman, Eronning mardona raqobatchisi Parham Magsudlu va, albatta, O‘zbekiston sharafini himoya qilayotgan Javohir Sindarov.
Muxlislarni quvontirgan jihatlardan biri — 19 yoshli Sindarovning elita bilan bir safga qo‘yilishi. U so‘nggi yillardagi ijobiy o‘sish dinamikasi, murakkab pozitsiyalarda topqirligi va bosim ostida ham sokin o‘ynay olishi bilan tanilgan. Keyptaunda unga qarshi turnirning eng kuchli raqiblari chiqadi va bu holat Javohirning shaxsiy rivojida navbatdagi katta qadam bo‘lishi shubhasiz.
Turnir boshlanishi arafasida butun shaxmat jamoatchiligi intriga va intiqlik bilan kutmoqda. Keyptaundagi duellar nafaqat yuqori darajadagi mahoratni, balki freestyle formatining beqiyos yangiliklarini ham namoyon etadi.
Shubhasiz, musobaqa davomida har bir partiya — o‘ziga xos spektakl, har bir yurish — katta mas’uliyat va g‘alaba uchun qo‘yilgan qadam bo‘ladi. Zamin.uz sayti orqali musobaqaning barcha muhim yangiliklarini kuzatib boring — intellektual janglar endi boshlanyapti.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
