Kecha bo‘lib o‘tgan Jahon chempionati–2026 qur’a tashlash marosimi butun mamlakatni bir holatga keltirdi — O‘zbekiston terma jamoasi o‘zining ilk mundialida "K" guruhidan joy oldi. Raqiblar juda nufuzli: Krishtianu Ronaldu boshchiligidagi Portugaliya, katta tajribaga ega Kolumbiya va pley-off g‘olibi bo‘ladigan jamoa.
Shu nuqtada Portugaliyaning mundiallar tarixida Osiyo qit’asiga qarshi o‘yinlar statistikasi yanada qiziq tuyuladi. Yevropaning eng kuchli termalaridan biri bo‘lgan portugallar Osiyo vakillariga qarshi 6 marta maydonga tushgan va natijalar mutlaq ustunlikni ham, kutilmagan yutqazishlarni ham o‘z ichiga oladi.
Umumiy hisob: 3 ta g‘alaba, 1 durang, 2 mag‘lubiyat.
Portugaliyaning Osiyoga qarshi mundial bahslari shunday ko‘rinishga ega:
• 1966 — Portugaliya 5:3 KXDR
Yevropa termasi o‘sha yillar afsonasi Eysebio boshchiligida kechgan dramatik o‘yinda katta qiyinchilik bilan g‘alaba qozongan.
• 2002 — Portugaliya 0:1 Janubiy Koreya
Mezbonlar syurprizi sifatida yodda qolgan o‘yin.
• 2006 — Portugaliya 2:0 Eron
Muvozanatlashgan tarkib o‘z ustunligini namoyish etgan bellashuv.
• 2010 — Portugaliya 7:0 KXDR
Mundial tarixidagi yorqin natijalardan biri.
• 2018 — Portugaliya 1:1 Eron
Guruh bosqichidagi qiyin bahs — Eron kurasha olishini isbotlagan o‘yin.
• 2022 — Portugaliya 1:2 Janubiy Koreya
Yana bir sensatsiya. Koreya bu safar ham kutilmagan natija qayd etdi.
Portugaliyaning Osiyo jamoalariga qarshi o‘yinlari ko‘rsatadiki — raqib qay darajada kuchli bo‘lmasin, Osiyo futbolining dinamikasi va intizomi ularni qisman qiynar ekan. Bu esa O‘zbekiston uchun ilhom beradigan jixatlardan biri.
2026-yilda termamiz Yevropa grandiga qarshi yangi tarix yozish imkoniyatiga ega bo‘ladi. Raqib kuchli, ammo vaziyat umuman umidsiz emas — mundialga yo‘l olgan jamoaning har bir o‘yinida imkoniyat bor.
Muxlislar esa bitta narsadan ishonchda: bu yilgi jahon chempionatida O‘zbekiston termasi kurashdan chekinmaydi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
