16:03 / 13.12.2025

APLning eng qimmat futbolchilari jamoasi tuzildi

Mashhur Transfermarkt portali Angliya Premer-ligasi futbolchilarining bozor qiymatlarini yangi yil arafasida yangiladi. Ushbu ma’lumotlar asosida "Evro-Futbol.ru" nashri chempionatning eng qimmat futbolchilari jamoasini e’lon qildi.

Jamoaning umumiy qiymati 1,19 milliard yevroni tashkil etgan bo‘lib, unda Londonning "Arsenal" klubidan to‘rt nafar futbolchi joy olgan. Darvozabon: Jamoaning eng qimmat darvozaboni – Gianluiji Donnarumma ("Manchester Siti", 45 million yevro).

Sentyabr oyida "PSJ"dan "Manchester Siti"ga o‘tgan italiyalik darvozabon Angliyada 17 ta o‘yinda maydonga tushib, 7 ta o‘yinda darvozasi daxlsizligini saqlab qoldi. Uning bozor qiymati 40 million yevrodan 45 million yevroga ko‘tarildi.

Himoyachilar: Himoya chizig‘ini Josko Gvardiol ("Manchester Siti", 70 million yevro), Gabriel dos Santos ("Arsenal", 75 million yevro) va Vilyam Saliba ("Arsenal", 90 million yevro) tashkil etadi. "Arsenal"ning himoyada muvaffaqiyatli o‘yini tufayli ushbu jamoada ikki futbolchining o‘rin olishi mantiqan to‘g‘ri.

Joriy mavsumda Mikel Artetaning shogirdlari 15 ta o‘yinda atigi 9 ta gol o‘tkazib yuborib, Yevropaning eng kuchli himoya chizig‘iga ega bo‘lib turibdi. Yarim himoyachilar: Yarim himoya chizig‘ida "Chelsi" va "Arsenal" futbolchilari teng ravishda vakillik qilmoqda: Moyses Kaysedo ("Chelsi", 110 million yevro), Deklan Rays ("Arsenal", 120 million yevro), Koul Palmer ("Chelsi", 120 million yevro) va Bukayo Saka ("Arsenal", 130 million yevro).

Shuningdek, Floriyan Virtz ("Liverpul", 110 million yevro) ham ushbu ro‘yxatga kiritilgan. Virtzning narxi "Bayer"dan "Liverpul"ga o‘tgandan keyin 130 million yevrodan 110 million yevroga tushib ketdi.

Hujumchilar: Dekabr oyidagi yangilanishdan so‘ng Erling Holand ("Manchester Siti", 200 million yevro) dunyoning eng qimmat futbolchisi unvonini yana Lamal Jamal bilan bo‘lishmoqda. Bu norvegiyalik futbolchi uchun haqli e’tirof.

Shuningdek, Aleksandr Isak ("Liverpul", 120 million yevro) ham ushbu ro‘yxatga kiritilgan. Ammo shved futbolchining "Nyukasl"dan "Liverpul"ga o‘tishi bilan bog‘liq masalalar uning narxini 20 million yevroga pasaytirdi.