BAAning Dubay shahrida boks bo‘yicha erkaklar o‘rtasidagi Jahon chempionati o‘z yakuniga yetdi. Dunyo boksi elitasi jam bo‘lgan ushbu musobaqada terma jamoalar o‘rtasidagi umumjamoaviy bahs ham katta qiziqish uyg‘otdi.
Rasmiy natijalarga ko‘ra, medallar jadvalida Rossiya terma jamoasi yetakchilik qildi. Rossiyalik bokschilar 7 ta oltin, 5 ta kumush va 1 ta bronza medalni qo‘lga kiritib, umumiy hisobda birinchi o‘rinni egalladi. Ikkinchi pog‘onadan Qozog‘iston jamoasi joy oldi — ular hisobiga 3 ta oltin, 1 ta kumush va 2 ta bronza medal yozildi.
O‘zbekiston terma jamoasi esa chempionatni juda munosib natija bilan yakunladi. Bokschilarimiz 2 ta oltin, 4 ta kumush va 3 ta bronza medal jamg‘arib, umumjamoaviy hisobda uchinchi o‘rinni egalladi. Bu natija O‘zbekiston boksi so‘nggi yillarda jahon miqyosida barqaror o‘sib borayotganini yana bir bor tasdiqladi.
To‘rtinchi o‘rindan Ozarbayjon terma jamoasi joy oldi. Ular 1 ta oltin va 2 ta bronza medal bilan chempionatni yakunladi. Qirg‘iziston va Tojikiston jamoalari esa 1 tadan kumush va bronza medal bilan beshinchi–oltinchi o‘rinlarni bo‘lishib oldi. Belarus terma jamoasi hisobida esa 1 ta kumush medal qayd etildi.
Qayd etish joiz, Dubaydagi ushbu jahon chempionati nafaqat medallar, balki yosh bokschilarning tajriba orttirishi, kuchli raqiblar bilan sinovdan o‘tishi va kelajakdagi Olimpiya hamda jahon musobaqalari oldidan muhim tayyorgarlik bosqichi bo‘ldi.
O‘zbekiston terma jamoasining umumjamoaviy uchinchi o‘rinni egallashi esa mamlakat boksi uchun katta yutuq sifatida baholanmoqda. Bu natija muxlislarga yangi g‘alabalarga bo‘lgan ishonchni yanada oshirdi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
