Ispaniya La Ligasining 16-turi doirasida Xans-Diter Flik qo‘l ostidagi «Barselona» o‘z maydonida «Osasuna»ni qabul qildi. «Kamp Nou»da o‘tgan bellashuvda kataloniyaliklar to‘liq ustunlik namoyon etib, 2:0 hisobida muhim g‘alabani qo‘lga kiritdi.
Uchrashuv davomida «ko‘k-anorranglilar» to‘p nazorati va pozitsion hujumlarda raqibidan ancha ustun ko‘rindi. Biroq «Osasuna» uzoq vaqt davomida himoyada chidamli o‘ynab, hisob ochilishiga yo‘l qo‘ymadi. Faqat ikkinchi taym o‘rtalariga kelib, maydondagi ustunlik aniq samara berdi.
70-daqiqada Pedrining aniq va o‘ylangan uzatmasidan so‘ng Rafinya hisobni ochdi. Braziliyalik vinger ushbu vaziyatda sovuqqonlik bilan harakat qilib, darvozabonga hech qanday imkoniyat qoldirmadi. O‘yin so‘ngiga yaqin esa Rafinya yana bir bor o‘z mahoratini namoyish qildi — 86-daqiqada u dublni rasmiylashtirib, jamoasi g‘alabasini mustahkamladi.
Barselona – Osasuna 2:0
Gol: Rafinya 70, 86
Barselona – Joan Garsiya, Balde (Kristensen, 88), Kubarsi (Fermin Lopes 75), Kunde, Jerar Martin, Erik Garsiya, Pedri, Torres, Rafinya (Kasado, 88), Yamal, Reshford (De Yong, 74)
Osasuna – Errera, Argubide (Rose, 69), Boyomo, Katena, Errardo, Bretones, Monkayola, Torro, Munos (Beker, 65), Oros, Budimir (R. Garsiya, 64)
Bu natijadan keyin «Barselona» ochkolar jamg‘arishda to‘xtab qolmadi. Jamoa hisobidagi ochkolar soni 43 taga yetdi va peshqadamlik yanada mustahkamlandi. Shu tariqa kataloniyaliklar asosiy raqibi «Real Madrid»dan ustunlikni 7 ochkogacha oshirib oldi.
Ayni paytda «qirollik klubi» ushbu turdagi o‘z uchrashuvini keyinroq o‘tkazadi. Biroq «Barselona» muxlislari uchun bu g‘alaba jamoaning chempionlik yo‘lidagi ishonchli qadamlaridan biri sifatida alohida ahamiyat kasb etdi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
