Angliya Premer-ligasining 16-turi doirasida “Manchester Siti” Londonga safar uyushtirib, “Kristal Pelas”ni yirik hisobda mag‘lub etdi. Xosep Gvardiola shogirdlari ushbu bellashuvda maydon egalarini deyarli imkoniyatsiz qoldirib, 3:0 hisobida ishonchli g‘alaba bilan ortga qaytdi.
Uchrashuv qahramoni, shubhasiz, Erling Xoland bo‘ldi. Norvegiyalik to‘purar mazkur bahsda dubl qayd etib, chempionat to‘purarlar poygasidagi yetakchiligini yanada mustahkamlab oldi. Yana bir gol esa Fil Foden hisobiga yozilib, jamoaning umumiy ustunligini yaqqol namoyon qildi.
Statistika mutaxassislari Xolandning joriy mavsumdagi samaradorligini alohida e’tirof etmoqda. 25 yoshli hujumchi mavsum boshidan buyon klub va milliy terma jamoa safida jami 27 ta uchrashuvda maydonga tushib, raqiblar darvozasini 35 marta ishg‘ol qildi. E’tiborlisi, bu natija hali mavsumning yarmidan ko‘p qismi oldinda turgan bir paytda qayd etilmoqda.
Ma’lumot o‘rnida, Xoland “Manchester Siti” tarkibida barcha musobaqalarda 22 ta gol urgan. Shu bilan birga, Norvegiya milliy terma jamoasida ham u samaradorligini saqlab qolib, 13 ta gol muallifiga aylangan.
Qisqasi, Erling Xoland hozirgi paytda nafaqat “Siti”, balki butun Yevropa futbolida eng xavfli hujumchilardan biri ekanini yana bir bor isbotlab bormoqda. Mavsum esa endi qizig‘idan boshlanyapti.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
