Madridning «Real» klubi Braziliya futbolida porlab kelayotgan yosh hujumchi Rayanni o‘z safiga qo‘shib olish masalasida jiddiy qadam tashlashga hozirlik ko‘rmoqda. Fichajes nashri tarqatgan ma’lumotlarga ko‘ra, «qaymoqranglilar» «Vasko da Gama» safida o‘ynayotgan 19 yoshli futbolchi uchun dastlabki rasmiy taklif ustida ish olib bormoqda.
Manba qayd etishicha, Madrid klubi iqtidorli braziliyalikni transfer qilish uchun taxminan 50 million yevro ajratishga tayyor. Bu esa «Real»ning Rayanga bo‘lgan qiziqishi jiddiy ekanini ko‘rsatadi. Avvalroq, «Barselona» ham ushbu futbolchi uchun Braziliya klubiga 30 million yevrolik taklif bilan chiqqan, ammo hozircha kelishuvga erishilmagani aytilmoqda.
Rayan 2025 yil mavsumida juda samarali o‘yin namoyish etdi. U barcha musobaqalar doirasida 55 ta uchrashuvda maydonga tushib, 20 ta gol urishga muvaffaq bo‘ldi va jamoadoshlari uchun 1 marta golli uzatmani amalga oshirdi. Bu ko‘rsatkichlar yosh hujumchini Yevropa grandlari diqqat markaziga olib chiqdi.
Futbolchining «Vasko da Gama» bilan tuzilgan amaldagi shartnomasi 2028 yil oxirigacha amal qiladi. Transfermarkt portali ma’lumotlariga ko‘ra esa, Rayanning hozirgi bozor qiymati 25 million yevro deb baholanmoqda. Shu bois, uning ehtimoliy transferi Braziliya klubi uchun ham moliyaviy jihatdan katta foyda keltirishi mumkin.
Mutaxassislar fikricha, agar ushbu bitim amalga oshsa, Rayan «Real»ning kelajak rejalarida muhim o‘rin egallashi va klubning hujum chizig‘ini yanada kuchaytirishi mumkin.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
