Angliya Liga kubogi yarim finali doirasida «Manchester Siti» va «Brentford» o‘rtasidagi muhim to‘qnashuv boshlanish arafasida. Uchrashuv oldidan har ikki jamoaning boshlang‘ich tarkiblari e’lon qilindi va ular orasida eng ko‘p e’tibor tortgan ism — hamyurtimiz Abduqodir Husanov bo‘ldi.
Avvaldan ayrim nufuzli nashrlar o‘zbek himoyachisining bugungi bahsda ilk daqiqalardan maydonga tushishini taxmin qilgan edi. Bu prognozlar o‘z tasdig‘ini topdi: Husanov «shaharliklar»ning asosiy tarkibidan joy oldi va markaziy himoya chizig‘ida Natan Ake bilan birga harakat qiladi.
Xosep Gvardiola yarim final kabi muhim o‘yinda yoshlar va tajribali futbolchilarni uyg‘unlashtirgan tarkibni tanladi. Darvozani Jeyms Trafford qo‘riqlaydi. Himoyada Riko Lyuis, Abduqodir Husanov, Natan Ake va Niko O’Rayli joy olgan. Maydon markazida Niko, Tijani Reynders hamda Oskar Bobb o‘yinni boshqaradi. Hujum chizig‘ida esa Rayan Sherki, Savino va Divayn Mukasaga ishonch bildirilgan.
Zaxira o‘rindig‘ida ham katta nomlar bor: Donnarumma, Diash, Gvardiol, Nunes, Bernardo Silva, Xoland va Foden kabi yulduzlar kerak bo‘lsa o‘yin taqdirini o‘zgartirishga tayyor.
Abduqodir Husanov uchun bu uchrashuv yana bir muhim sinov. Kubok yarim finalida asosiy tarkibda maydonga tushish — murabbiylar ishonchi va uning jamoadagi o‘rni tobora mustahkamlanayotganidan dalolat. Muxlislar esa o‘zbek himoyachisidan ishonchli o‘yin va qat’iyat kutishmoqda.
Qisqasi, «Manchester Siti» bugun yarim finalga maksimal darajada jiddiy yondashmoqda. Husanov esa nafaqat jamoasi, balki o‘zbek futboli uchun ham tarixiy bahsda ishtirok etish ostonasida.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
