O‘tgan mavsum "Barselona"ni Ispaniya chempionligiga olib chiqqan Xans-Diter Flik futbolda muvaffaqiyat har doim katta sarmoyaga bog‘liq emasligini amalda isbotlab berdi. Nemis mutaxassisi qisqa vaqt ichida jamoa o‘yinini tizimli ravishda yaxshilab, kam xarajat bilan ham yuqori natijaga erishish mumkinligini ko‘rsatdi.
Flik kataloniyaliklar boshqaruvini qo‘lga olganidan beri transfer bozorida juda ehtiyotkor siyosat olib bormoqda. Manbalarga ko‘ra, u shu paytgacha yangi o‘yinchilar uchun bor-yo‘g‘i 88 million yevro sarflagan. Shunga qaramay, jamoa joriy mavsumda ham Ispaniya La Ligasida barqaror o‘yin namoyon etib, turnir jadvalida ishonchli yetakchilikni saqlab kelmoqda.
Qizig‘i shundaki, Flikning bu natijalari Ispaniyaning boshqa grandlari bilan solishtirilganda yanada yorqin ko‘rinadi. Masalan, Madridning "Atletiko" klubi so‘nggi mavsumlarda tarkibni kuchaytirish uchun 364 million yevro sarmoya kiritgan. Ashaddiy raqib hisoblangan "Real" esa 216 million yevro atrofida mablag‘ni transferlarga yo‘naltirgan.
Shu bilan birga, "Vilyarreal" yangi futbolchilar uchun 171 million yevro ajratgan bo‘lsa, "Betis" ham 101 million yevro sarflab, bu ko‘rsatkich bo‘yicha «Barselona»dan oshib ketgan.
Ammo raqamlar maydondagi holatni to‘liq aks ettirmaydi. Flik boshchiligida «Barselona» jamoaviy o‘yin, intizom va taktik muvozanatga tayanayotgani bilan ajralib turibdi. Bu esa muxlislarga shunday xulosani beradi: aqlli strategiya va to‘g‘ri yondashuv ba’zan milliardlardan ham qimmatroq bo‘lishi mumkin.
Mehmon guruhidagi foydalanuvchilar ushbu nashrga izoh qoldira olmaydi.
