Germaniya terma jamoasining sobiq yarimhimoyachisi, jahon futbolida katta tajribaga ega Toni Kroos 2026 yilgi jahon chempionati oldidan o‘z qarashlari bilan o‘rtoqlashdi. Unga ko‘ra, navbatdagi mundialda g‘alaba uchun asosiy da’vogarlar sifatida bir nechta jamoa alohida ajralib turibdi.
Kroos Ispaniya, Portugaliya, Fransiya va Marokash terma jamoalarini bo‘lajak chempionatning eng kuchli favoritlari deb atadi. Ushbu jamoalar oxirgi yillarda barqaror o‘yini, kuchli tarkibi va xalqaro tajribasi bilan ajralib turganini ta’kidladi.
Shu bilan birga, sobiq yulduz futbolchi Germaniya terma jamoasi haqida ham o‘z fikrini yashirmadi. Uning so‘zlariga ko‘ra, nemislar jamoasini hozircha chempionlik uchun asosiy da’vogarlar safida ko‘rish qiyin. Biroq u Germaniya termasi kamida chorak final, ehtimol yarim finalgacha yetib borishiga ishonishini bildirdi.
Eslatib o‘tish joiz, avvalroq superkompyuter tahlillari ham e’lon qilingan edi. Unga muvofiq, 2026 yilgi jahon chempionatida Ispaniyaning chempion bo‘lish ehtimoli 17 foizga baholangan. Fransiya esa ushbu reytingda ikkinchi o‘rindan joy olgan.
Ma’lumot uchun, navbatdagi jahon chempionati 2026 yil 11 iyundan 19 iyulgacha AQSH, Kanada va Meksikada bo‘lib o‘tadi. Ushbu musobaqa tarixda ilk bor 48 ta terma jamoa ishtirokida o‘tkazilishi bilan ham alohida ahamiyat kasb etadi.
Muxlislarni esa oldinda uzoq, kurashlarga boy va kutilmagan syurprizlarga to‘la futbol bayrami kutib turibdi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
