Qatarda o‘tkazilgan FIDE World Rapid Championship musobaqasi o‘z yakunlariga yetdi va u shohmat muxlislari uchun juda boy voqealarga to‘la bo‘ldi. Dunyoning eng kuchli grossmeysterlari jam bo‘lgan nufuzli turnirda O‘zbekiston terma jamoasi vakillari ham munosib ishtirok etib, bir qator yuqori natijalarni qayd etdi.
O‘zbekistonlik shaxmatchilar natijalari
Erkaklar o‘rtasida eng yaxshi natijani Javohir Sindarov ko‘rsatdi. U 9 ochko jamg‘arib, umumiy hisobda 7-o‘rinni egalladi va turnir davomida barqaror o‘yini bilan e’tibor qozondi.
Nodirbek Abdusattorov 8,5 ochko bilan 23-pog‘onadan joy oldi. Uning o‘yin uslubi mutaxassislar tomonidan ijobiy baholandi. Shuningdek, Muhiddin Madaminov va Nodirbek Yakubboyev 7,5 ochkodan to‘plab, o‘rta qismida finish qilishdi. Jahongir Vohidov, Humoyun Begmuratov va Shamsiddin Vohidov ham 7 ochko bilan musobaqani munosib yakunladi.
Ayollar o‘rtasida esa Afruza Hamdamova 7 ochko bilan 22-o‘rinni egallab, O‘zbekiston terma jamoasi uchun eng yaxshi natijani qayd etdi. Gulruhbegim Tohirjonova 6,5 ochko bilan 31-o‘rindan joy oldi. Umida Omova, Madiinabonu Halilova, Guldona Karimova va Nilufar Yakubboyeva ham jahon miqyosida muhim tajriba orttirdi.
Jahon chempionlari aniqlandi
2025 yilgi tezkor shaxmatlar bo‘yicha jahon chempionatida erkaklar o‘rtasida yana bir bor Magnus Karlsen g‘alaba qozondi. Turnir davomida Vladislav Artemevdan uchralgan mag‘lubiyat norvegiyalik maestroni izdan chiqarmadi. Aksincha, u shundan keyin ketma-ket besh partiyada g‘alaba qozonib, so‘nggi turda Anish Giri bilan durang o‘ynab, musobaqani birinchi o‘rinda yakunladi. Bu Karlsen uchun rapid bo‘yicha oltinchi jahon chempionligi bo‘ldi.
Ayollar o‘rtasida esa chempionlik Aleksandra Goryachkinaga nasib etdi. Asosiy masofada u Xampi Koneru va Chju Sziner bilan birinchi o‘rinni bo‘lishib oldi. Reglamentga muvofiq o‘tkazilgan tay-breykda Goryachkina birinchi partiyada g‘alaba qozondi, ikkinchisini durang bilan yakunlab, jahon chempioni degan yuksak unvonni qo‘lga kiritdi.
Xulosa qilib aytganda, Qatardagi rapid chempionat O‘zbekiston shaxmat maktabining raqobatbardoshligini yana bir bor ko‘rsatdi. Oldinda blis bahslari va yangi musobaqalar turibdi, demak, shohmat muxlislarini hali yana ko‘p qiziqarli lahzalar kutmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
