Madridning "Real Madrid" klubi tarkibni yangilash rejalari doirasida katta qaror ostonasida turibdi. Ispaniyaning nufuzli Cadena SER nashri tarqatgan ma’lumotlarga ko‘ra, «qirollik klubi» Pari Sen-Jermen yarim himoyachisi Vitinyani o‘z safiga qo‘shib olishni rejalashtirmoqda, ammo bu transfer muayyan shartga bog‘liq.
Manbaga ko‘ra, madridliklar faqatgina Vinisius Junior bilan xayrlashgan taqdirdagina Vitinyani sotib olishga harakat qiladi. Agar braziliyalik yulduz klub bilan amaldagi shartnomasini uzaytirishdan voz kechsa, «qaymoqranglilar» uni kamida 100 million yevroga sotishni rejalashtirgan. Ana shu mablag‘ portugaliyalik xavbek transferiga yo‘naltirilishi mumkin.
Ayni paytda 25 yoshli Vitinyaning transfer bozoridagi qiymati taxminan 110 million yevroni tashkil etadi. Uning parijliklar bilan tuzgan shartnomasi 2029 yil yoziga qadar amal qiladi va PSJ rahbariyati futbolchini osonlikcha qo‘yib yuborish niyatida emas.
Joriy mavsumda Vitinya o‘zini Yevropadagi eng barqaror va samarali yarim himoyachilardan biri sifatida ko‘rsatmoqda. U PSJ safida barcha musobaqalarda 30 ta uchrashuvda maydonga tushib, 6 ta gol urdi va 10 ta samarali uzatmani amalga oshirdi. Uning o‘yinni boshqarishdagi aqli, maydon markazidagi faolligi va yuqori texnikasi «Real» skautlari e’tiborini tortgani aytilmoqda.
Shu tariqa, Vitinyaning Madridga ehtimoliy ko‘chishi Vinisius taqdiriga bevosita bog‘liq. Agar braziliyalik forvard jamoani tark etsa, «Real» yangi markaziy figura atrofida jamoa qurishni boshlashi mumkin. Ammo hozircha bu ssenariy faqatgina katta transfer o‘yinidagi ehtimoliy variant sifatida qolmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
