«Manchester Yunayted» bosh murabbiyi Ruben Amorim jamoa taktik sxemasidagi o‘zgarishlar yuzasidan o‘z qarashlarini bayon qildi. Mutaxassis bu qaror tasodifiy emas, balki mavjud vaziyatdan kelib chiqqan holda qabul qilinganini ta’kidladi.
APL doirasida «Nyukasl»ga qarshi o‘tgan uchrashuvda (1:0) Amorim odatda qo‘llaniladigan uch himoyachili sxema o‘rniga to‘rt nafar himoyachi bilan harakat qilishni ma’qul ko‘rdi. Bu qaror jamoa o‘yiniga ijobiy ta’sir ko‘rsatgani bilan ham e’tiborga tushdi.
Portugaliyalik murabbiyning aytishicha, u jamoani qabul qilib olgan dastlabki davrda mavjud futbolchilar bilan muayyan tizimda barqaror o‘ynash oson bo‘lmasligini oldindan anglagan.
«Bu jarayon boshlanishi edi. Biz o‘z o‘yin uslubimizni shakllantirishga intildik. Hozir esa sharoit o‘zgardi: tarkib keng emas, ayrim pozitsiyalarda tanlov cheklangan. Shuning uchun biz moslashishga majburmiz, futbolchilar ham nima uchun o‘zgarish ketayotganini anglashi kerak», — dedi Amorim.
U, shuningdek, qaror ommaviy axborot vositalari yoki muxlislar bosimi ostida qabul qilinmaganini qat’iy ta’kidladi.
«Agar sxemani matbuot aytgani uchun o‘zgartirsam, futbolchilar buni sezadi. Bunday holatda murabbiy uchun ish tugagan hisoblanadi. Men bunday yo‘l tutmayman», — deya fikrini davom ettirdi u.
Amorimning so‘zlariga ko‘ra, jamoa o‘z tizimida ishonchli o‘ynay boshlaganidan keyingina taktik jihatdan yangiliklar kiritish maqsadga muvofiq bo‘ladi. Barcha futbolchilar safga qaytgach, «Manchester Yunayted» doimiy ravishda uch himoyachi bilan o‘ynab qolmasligini ham murabbiy ochiq aytdi.
Shu tariqa, Amorimning pozitsiyasi aniq: natija va mavjud resurslar — har qanday taktik qarorning asosiy mezoni.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
