Lamin Yamal o'tgan yozda 18 yoshni qarshi oldi, biroq bu yoshga kelib “eng yosh” degan qo'shimcha bilan tilga olinadigan rekordlarni allaqachon yig'ib ulgurdi. E'tiborlisi, u 17 yoshini nishonlaganidan atigi ikki kun o'tib Ispaniya bilan Yevropa chempioni ham bo'ldi. Bu haqda euro-football.ru xabar beradi.
Bugun Yamal faqat maydondagi futbolchi emas, u allaqachon brendga aylangan. Tijoriy loyihalari tez sur'atlarda kengaymoqda. Ammo shunchalik erta va shiddatli start doim ham silliq yakun kafolatlamaydi: futbol tarixida aynan eng gullagan paytida yo'ldan adashib, o'z salohiyatini yo'qotgan yulduzlar ko'p.
Transfermarkt talqiniga ko'ra, Yamal hozircha dunyodagi eng qimmat futbolchi: uning taxminiy narxi 200 mln yevroga baholanmoqda. Bunda mantiq bor — yosh, natijalardagi barqarorlik va katta potentsial bunday raqamni oqlaydi. Eng qimmat 30 futbolchi ichida 20 yoshga yetmaganlar esa deyarli yo'q: Yamal bilan birga ro'yxatda faqat uning jamoadoshi Pau Kubarsi bor, u 80 mln yevroga baholangan.
Biroq Yamal tobora ko'proq maydon tashqarisidagi harakatlari bilan ham muhokama qilinmoqda. Dabdabali bazmlar, tez-tez o'zgaradigan soch turmagi va shaxsiy hayot atrofidagi gap-so'zlar — bularning bari 18 yoshli futbolchi katta pul va mashhurlikni qanday boshqarishni hali to'liq o'rganmaganini eslatadi. Katta mablag' ta'mini bilishi bilan boshi aylangan futbolchilar oz bo'lmagan — natijada o'yin darajasi ham, karyera ham pasayib ketgan.
Shunday misollardan biri — El-Haji Diuf. 2002 yilgi jahon chempionatida Senegal terma jamoasining sensatsion yurishida u bosh qahramonlardan bo'ldi va tezda “Liverpul”dan taklif oldi. Ammo Diuf futboldan ko'ra o'z imijiga ko'proq berilib ketdi: kumushrang qoplamali “Mersedes”, oltin tusga kiritilgan “Kadillak” kabi dabdabali xaridlar, muxlislarga tupurishgacha borgani aytiladigan janjallar, hakamlar va federatsiya bilan tortishuvlar — bular karyerasiga og'ir zarba bo'ldi.
Dmitriy Sychev ham 2002 yildan keyin muhim tanlovda adashgan futbolchilardan sanaladi. U yaqindagina Tambovning “Spartak”ida o'ynagan bo'lsa-da, qisqa fursatda butun Rossiya e'tiborini tortdi. Ko'pchilik Moskvadagi “Spartak” hujumiga kuchli qo'shimcha kelganini, keyin esa futbolchi Yevropaning top klublaridan biriga ketishini kutgandi. Lekin “Marsel”dan so'ng Sychev o'n yil “Lokomotiv”da qolib ketdi va orzu qilingan Yevropa karyerasini to'liq ro'yobga chiqara olmadi.
“Barselona” tarbiyalagan Bojan Krkich esa psixologik bosim futbolchining taqdirini qanday o'zgartirib yuborishini ko'rsatgan misol. U 17 yosh 19 kunligida katalonlar safida debyut qilib, Lionel Messining rekordini yangilagan va darhol “yangi fenomen” deb e'lon qilingan. Ammo haddan tashqari kutishlar Bojanning ruhiyatiga qattiq ta'sir qildi: mashg'ulotlarda yulduzlar davrasida u hatto suv shishasini olishga ham tortingan deyishadi. Vaqt o'tib vahima xurujlari kuchayib, uning karyerasi keskin pasayish yo'liga kirdi.
Angliya futbolida esa Dele Alli katta umidlarni oqlay olmagan yorqin nomlardan. U 19 yoshida “Tottenhem”da debyut qilib, tezda asosiy tarkib futbolchisiga aylandi va kelajakda terma jamoa yetakchisi bo'lishi kutilgandi. Ammo aynan eng yuqori cho'qqiga yaqinlashgan paytda pasayish boshlandi: zararli odatlar, shaxsiy hayotga berilib ketish, mashg'ulotlarga sovuqqon munosabat va uyqu dorilariga qaramlik — bularning bari uni 29 yoshida karyerasini yakunlash haqida o'ylash darajasiga olib keldi.
Mario Balotelli esa — yo'qotilgan potentsial haqida gap ketganda, deyarli har qanday ro'yxatda uchraydigan ism. Intizomsizlik, jamoadoshlar va murabbiylar bilan mojarolar, oilaviy muammolar, tinimsiz shov-shuvlar va g'alati qiliqlar — masalan, uyining vannasida feyerverk yoqib, yong'in chiqarib yuborgani haqidagi voqea — bularning barchasi katta iqtidorni barqaror natijaga aylantirish qanchalik qiyinligini ko'rsatadi. Xulosa oddiy: kasbga munosabat jiddiy bo'lmasa, eng iste'dod ham katta yutuqlarni kafolatlamaydi.
O'z vaqtida eng ko'p tilga olingan “so'ngan yulduzlar” qatorida Balotelli, Sychev, Alli, Krkich va Diuf kabi futbolchilar bor. Ularning har biri saboq: erta mashhurlik va katta pul — to'g'ri boshqarilmasa, katta karyerani ham yemirishi mumkin.
Endi savol Yamal atrofida: u shu shiddatni maydonda ham, maydon tashqarisida ham to'g'ri yo'naltira oladimi va karyerasida hech bo'lmaganda bitta “Oltin to'p”ga yetib boradimi — javobini vaqt ko'rsatadi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
