“Manchester Yunayted”da murabbiylar shtabida katta o‘zgarish qayd etildi. Portugaliyalik mutaxassis Ruben Amorim lavozimidan iste’foga chiqarildi. Klub matbuot xizmati bu qaror bo‘yicha rasmiy bayonot berib, Amorimning qisqa vaqt ichida jamoa bilan qilgan ishlarini alohida eslab o‘tdi.
Bayonotda ta’kidlanishicha, Ruben Amorim 2024-yilning noyabr oyida jamoa boshqaruviga kelgan va may oyida “MYU”ni Yevropa ligasi finaliga olib chiqqan edi. Biroq, klub rahbariyati Premer-ligadagi holatni inobatga olgan: mankunianlar hozirda turnir jadvalida 6-o‘rinda bormoqda. Shu sabab, klub “vaziyatni o‘zgartirish vaqti keldi” degan qarorga kelganini bildirgan.
Klub rahbariyati fikricha, bu qadam jamoaga Premer-ligada imkoni boricha yuqoriroq o‘rinlar uchun kurashishda yanada yaxshi imkoniyat yaratishi kerak. Shu bilan birga, “Yunayted” Amorimga qo‘shgan hissasi uchun minnatdorlik bildirib, uning kelgusi faoliyatiga omad tilagan.
Eng muhim yangiliklardan yana biri: jamoani navbatdagi o‘yinda — chorshanba kuni “Byornli”ga qarshi bahsda — Darren Fletcher boshqaradi. Shunday qilib, shotlandiyalik sobiq futbolchi mavsum yakuniga qadar “MYU” ruliga o‘tiradi. Fletcher bu paytgacha klubning U-18 jamoasi bilan ishlab kelayotgandi.
Eslatib o‘tamiz, “Manchester Yunayted” 20 turdan so‘ng 31 ochko jamg‘argan holda Angliya Premer-ligasi turnir jadvalida 6-pog‘onada turibdi. Endi esa muxlislar uchun yangi savol paydo bo‘ldi: “Fletcher effekti” jamoani haqiqatan ham yuqoriga torta oladimi?
“Zamin”ni Telegramʻda oʻqing!
