Kataloniya muxlislari uchun kutilgan xabar: qanot himoyachisi Joau Kanselu «Barselona»ga yana qaytmoqda. Insayder Fabritsio Romano ma’lum qilishicha, klub 31 yoshli portugaliyalik futbolchini «Al Hilol»dan mavsum oxirigacha ijaraga olish bo‘yicha kelishuvga kelgan.
Ma’lumotlarga ko‘ra, ijara haqi 4 million yevroni tashkil etadi. Ya’ni «Barsa» qishki oynada katta transfer “portlatmay”, lekin tajribali va universal futbolchi bilan tarkibni tezda kuchaytirmoqchi.
Ispaniya matbuoti ham moliyaviy tafsilotlarga oydinlik kiritmoqda: Mundo Deportivo yozishicha, «Barselona» Kanselu maoshining bir qismini — taxminan 5 mln yevroni ham o‘z zimmasiga oladi.
Eng muhim nuqta: Kanselu jamoa qaydnomasiga jarohat olib, taxminan 4 oyga safdan chiqqan Andreas Kristensen o‘rniga kiritiladi. Shu orqali klub tarkibdagi bo‘shliqni ham, ro‘yxatga olish masalasini ham hal qilayotgani aytilmoqda.
Qizig‘i, avvalroq Joauning transferi bo‘yicha «Inter» bilan og‘zaki kelishuv borligi haqida xabarlar chiqqan, ammo futbolchi aynan Ispaniya chempioni (Kataloniya klubi) safiga qaytishni istagani sabab vaziyat «Barselona» foydasiga hal bo‘lgani qayd etilmoqda.
Qisqasi, «Barsa» himoyadagi muammoni “pachka-pachka” sarf-xarajat qilmasdan yopdi: Kanselu keladi, Kristensenning yo‘qligi vaqtincha kompensatsiya qilinadi. Endi maydonda ham shunday chiqsa — kataloniyaliklar uchun yangi yarim mavsum ancha qiziq kechadi.
“Zamin”ni Telegramʻda oʻqing!
