«Andijon» klubi yangi mavsum oldidan murabbiylar shtabini yana bir tajribali mutaxassis bilan kuchaytirdi. Endi jamoada jismoniy tayyorgarlik bo‘yicha ishlarni serbiyalik murabbiy Branko Chirich olib boradi.
1983 yil 21 may kuni tavallud topgan Chirich futbolda ayni “forma zavodi” degan rolni bajaradigan mutaxassislar toifasidan. Uning so‘nggi ish joyi Qozog‘istonning «Astana» klubi bo‘lib, u yerda yuqori talab va qattiq rejimda ishlash tajribasini yanada boyitgan.
Chirich faqat «Astana» bilan cheklanib qolmagan: u oldinroq Serbiyaning «Vojdovas», «Radnichki», «Chukarikchi» jamoalarida, shuningdek Qozog‘istonning «Aktau» klubida ham jismoniy tayyorgarlik bo‘yicha murabbiy sifatida faoliyat yuritgan. Turli chempionatlar, turli uslublar — demak, “bir xil havo”da yurib qolmagan, adaptatsiyasi tez.
Qozog‘istondagi faoliyati davomida Chirich «Astana» bilan mamlakat chempionligi va Kubokni qo‘lga kiritgan. Shu bilan birga, jamoa safida Yevropa ligasi hamda Konferensiyalar ligasi bahslarida ishtirok etish tajribasiga ham ega. Ya’ni, u Yevropadagi yuqori temp va qattiq grafik nima ekanini yaxshi biladi.
Klubdagi umid katta: Branko Chirichning kelishi bilan «Andijon» futbolchilarining jismoniy holati yanada kuchayishi, chidamlilik va tezlik ko‘rsatkichlari oshishi kutilmoqda. Muxlislar esa, tabiiyki, maydonda “ikkinchi taymda ham benzin tugamaydigan” jamoani ko‘rishni istaydi.
“Zamin”ni Telegramʻda oʻqing!
