«Manchester Siti» safida to‘p surayotgan Abduqodir Husanov haqida navbatdagi iliq fikrlar yangradi. Jamoa bosh murabbiyi Xosep Gvardiola o‘zbek himoyachisining o‘yinini alohida e’tirof etib, uning raqiblarga qarshi qilayotgan harakatlari qanday ta’sir ko‘rsatayotganini ochiq aytdi.
«Husanov – aqlbovar qilmas futbolchi. U raqibning uzoq masofaga yo‘naltirilgan uzatmalariga qarshi harakatlanishimizda katta yordam berdi. U butun maydonni nazorat qila oladigan futbolchi! Abduqodir o‘sishda davom etmoqda. U yanada dadilroq harakat qilishi, to‘p nazoratida faolroq ishtirok etishi kerak – ammo bu vaqt masalasi. Bevosita himoyalanishda u ajoyib o‘yinchi!» — deya murabbiy so‘zlarini «City Report» keltirdi.
Bu gaplarda ikki muhim nuqta bor: birinchisi — Husanovning himoyadagi ishonchliligi. Ya’ni, raqib uzun paslar bilan xavf tug‘dirmoqchi bo‘lsa, Abduqodir bu vaziyatlarda jamoaga “qutqaruvchi” bo‘lib xizmat qilyapti. Ikkinchisi — uning o‘yinida hali ham o‘sish uchun katta zaxira bor. Murabbiy ham aynan shuni ta’kidlayapti: Husanov to‘p nazorati va qurilishda yanada faol bo‘lsa, uning darajasi yana bir pog‘ona yuqoriga chiqadi.
E’tiborlisi, bu tanqid emas — aksincha, katta ishonch belgisi. Chunki murabbiy “bu vaqt masalasi” deyapti. Demak, jamoa Abduqodirni loyiha sifatida emas, tayyor “katta futbolchi” sifatida ko‘ryapti va undan yana ko‘proq narsa kutayapti.
Ayni paytda «Manchester Siti» Angliya Premer-ligasi jadvalida 2-o‘rinda turibdi. «Shaharliklar» peshqadam «Arsenal»dan 6 ochko ortda qolmoqda. Demak, chempionlik poygasida har bir o‘yin, har bir epizod hal qiluvchi ahamiyat kasb etayotgan bir paytda Husanov kabi ishonchli himoyachining roli yanada katta.
Xulosa qilib aytganda, Abduqodir Husanov «Siti»da shunchaki maydonga tushayotgan legioner emas — u jamoaning muhim mexanizmlaridan biriga aylanib bormoqda. Endi muxlislar kutayotgani bitta: himoyadagi shu barqarorlik ustiga to‘p bilan o‘yinda ham yanada jasur, yanada ta’sirli Husanovni ko‘rish.
“Zamin”ni Telegramʻda oʻqing!
