“Barselona” sport direktori Deku “Real” bosh murabbiyi Xabi Alonsoning lavozimidan ketishi haqidagi xabarlarga munosabat bildirdi. Bu haqda euro-football.ru xabar beradi.
Uning aytishicha, kataloniyaliklar diqqatini faqat o'z ishlariga qaratgan va boshqa klublarda nimalar bo'layotganini muhokama qilishni istamaydi. Deku “Barselona” va “Real”da bosim doim kuchli bo'lishini, natijalar yurishmasa, birinchi bo'lib murabbiylar zarba ostida qolishini ta'kidladi.
Shu bilan birga, Deku Alonsoning ketishi biroz kutilmagan bo'lganini tan oldi: uning fikricha, vaqt juda kam o'tgan, “Real” esa La Ligada atigi to'rt ochko ortda, Chempionlar ligasida esa ishlar yomon emas. Biroq u klub ichidagi vaziyatni bilmagani uchun chetdan turib baho berishni to'g'ri deb hisoblamasligini aytdi.
Shuningdek, Deku Flik haqida gapirar ekan, “hislar raqamlardan ko'proq narsani aytadi” deya qo'shimcha qildi va “Barselona” Hans-Diter Flik bilan yaxshi davrlar albatta qaytishiga oldindan ishonganini eslatdi.
Ma'lum qilinishicha, “Real”ning yangi bosh murabbiyi etib Alvaro Arbeloa tayinlangan.
“Zamin”ni Telegramʻda oʻqing!
