Londonning «Chelsi» klubi Enso Mareska bilan hamkorlikni nima sababdan to‘xtatgani haqida yangi ma’lumotlar tarqaldi. Qayd etilishicha, klub rahbariyati bilan murabbiy o‘rtasida asosiy kelishmovchilik futbolchilarga qo‘yiladigan talablar, ayniqsa jismoniy yuklama masalasida yuzaga kelgan.
Manbalarga ko‘ra, Mareska jamoa ichida juda qattiqqo‘l tartib o‘rnatgan. Uning talabchanligi ba’zi futbolchilar uchun motivatsiya bo‘lgan bo‘lishi mumkin, ammo ayrim holatlarda bu yondashuv ortiqcha xavf tug‘dirgan. Eng ko‘p e’tiroz — endigina jarohatdan qaytgan o‘yinchilar bilan ishlashda ko‘zga tashlangan.
Gap shundaki, Enso jarohatdan tiklanayotgan futbolchilarga ham umumiy guruh darajasidagi og‘ir yuklamalarni bergan. Tibbiyot xodimlarining tavsiyalari va ehtiyot choralariga esa, aytilganidek, deyarli ahamiyat bermagan. Natijada ba’zi futbolchilarda jarohat qaytadan qo‘zg‘algani, tiklanish jarayoni uzaygani haqida ham gapirilmoqda.
Vaziyat jiddiy tus olgach, «Chelsi» rahbarlari murabbiylar shtabiga hatto jismoniy tayyorgarlik bo‘yicha qo‘shimcha mutaxassisni ishga olgan. Lekin Mareska u mutaxassis fikrlariga ham quloq solmagani aytiladi. Shu nuqtada klub bilan murabbiyning yo‘llari butunlay ajrala boshlagan: rahbariyat xavfsizlik va uzoq muddatli manfaatni birinchi o‘ringa qo‘ygan, Mareska esa maksimal talab va qattiq rejimdan qaytmagan.
Qisqasi, masala natija yoki taktikada emas — ichki tartib, yuklama va futbolchining salomatligiga munosabatda bo‘lgan. «Chelsi» esa bu chiziqda “eksperiment” qilishni istamagan.
“Zamin”ni Telegramʻda oʻqing!
