Germaniya chempionatining 17-turi muxlislar uchun ancha shiddatli va syurprizlarga boy o‘tdi. Tur markazida peshqadam "Bavariya"ning safarda qo‘lga kiritgan navbatdagi irodali g‘alabasi turdi.
Myunxenliklar "Kyoln" maydonida ilk bo‘limda qiyin ahvolga tushib qolganiga qaramay, tanaffusdan keyin butunlay boshqa jamoaga aylandi. Hisobda ortda qolgan «Bavariya» tajriba va "klass" hisobiga o‘yin taqdirini o‘z foydasiga hal qildi. Natijada 3:1 hisobidagi g‘alaba jamoaga nafaqat navbatdagi 3 ochkoni, balki eng yaqin ta’qibchi — "Borussiya D" bilan farqni yana 11 ochkoga yetkazish imkonini berdi. Qisqasi, chempionlik poygasida myunxenliklar hozircha raqiblariga “ko‘zga ko‘rinmas masofa” qoldirmoqda.
Kyoln — Bavariya 1:3
Gollar: Mayna (41) — Gnabri (45+5), Kim (71), Karl (84).
Kyoln — Shvabe, Simpson-Pasi, Sebulonsen, Lund, O‘zkajar, Kraus (Yohanesson, 78), Al Mala (Valshmidt, 79), Kaminskiy, Tilman (Niang, 84), Mayna (Shenten, 67), Axe (Byulter, 78).
Bavariya — Noyer, Kim, Ito (Gerreyru, 88), Ta (Upamekano, 67), Goretska, Laymer, Pavlovich, Olise (Bishof, 82), Dias, Gnabri (Karl, 67), Keyn.
Tur doirasida yana bir muhim uchrashuvda "Leypsig" o‘z maydonida "Frayburg"ni ishonchli tarzda mag‘lub etdi. Ikkinchi bo‘limda uriligan ikki gol o‘yin taqdirini hal qildi va «Leypsig» yuqori uchlikdagi o‘rnini mustahkamlab oldi.
Leypsig — Frayburg 2:0
Gollar: Orban (53), Romulo (56).
Ammo turning eng yorqin spektakli "Hoffenhaym" ishtirokida kechdi. "Borussiya M"ga qarshi bellashuvda Kramarich haqiqiy yulduzga aylandi. U qisqa vaqt ichida het-trik qayd etib, raqib mudofaasini parchalab tashladi. Natijada 5:1 hisobidagi yirik g‘alaba «Hoffenhaym»ni tur jadvalida yanada yuqori pog‘onalarga olib chiqdi.
Hoffenhaym — Borussiya M 5:1
Gollar: Kramarich (22 penalti, 45+1, 45+4), Lemperle (24), Moyerstedt (77) — Matino (69).
Shu tariqa, Bundesliganing 17-turi chempionlik kurashidagi intrigani yanada qizdirdi. Peshqadam o‘z yo‘lida ishonch bilan davom etmoqda, quvuvchilar esa har bir ochko uchun oxirigacha jang qilishga majbur. Oldinda yanada keskin va asabiy o‘yinlar kutyapti — futbol esa aynan shunday paytda eng mazali bo‘ladi.
“Zamin”ni Telegramʻda oʻqing!
