Kataloniyaning «Barselona» klubi Misrning «Al Ahli» jamoasi tarbiyalanuvchisi bo‘lgan 18 yoshli hujumchi Hamza Abdulkarim bilan dastlabki kelishuvga erishdi. Endi «ko‘k-anorranglilar» transferni rasmiylashtirish uchun to‘g‘ridan to‘g‘ri misrliklar bilan muzokaralarni davom ettirmoqda.
Qayd etilishicha, Abdulkarim Misr o‘smirlar terma jamoasidagi ishonchli o‘yini, harakatchanligi va jamoaga tez moslasha olishi bilan skautlar e’tiborini tortgan. Yosh forvard jamoaviy o‘yinda ham foydali: maydonda to‘g‘ri pozitsiya tanlaydi, tezlik qo‘shadi va raqib himoyasini doimiy bosimda ushlab turadi.
Ayniqsa, o‘tgan yil noyabr oyida bo‘lib o‘tgan U-17 jahon chempionatidagi ko‘rsatkichlari uning potensialini yanada ochib berdi: u 4 ta uchrashuvda qatnashib, 2 ta gol va 1 ta golli uzatma qayd etgan. Avvalroq Hamzaning o‘zi ham ehtimoliy transferga qiziqish bildirgani haqida ma’lumotlar tarqalgan edi.
Endi barcha diqqat klublar o‘rtasidagi kelishuv qanday yakun topishiga qaratilgan. Agar muzokaralar muvaffaqiyatli tugasa, «Barselona» yana bir yosh va istiqbolli hujumchini o‘z loyihasiga qo‘shib olishi mumkin — muxlislar esa yangi nomning katta sahnaga qanday kirib kelishini qiziqish bilan kutadi.
“Zamin”ni Telegramʻda oʻqing!
