UEFA Chempionlar ligasining umumiy bosqichi 7-turida «Real Madrid» o‘z maydonida «Monako»ni 6:1 hisobida katta farq bilan mag‘lub qildi. Ushbu go‘zal va to‘laqonli g‘alabada yarim himoyachi Jud Bellingem ham o‘z hissasini qo‘shdi: u 80-daqiqada gol urib, «Santyago Bernabeu» tribunalarini yana bir bor oyoqqa turg‘izdi.
Biroq o‘sha goldan ham ko‘ra ko‘proq muhokamaga sabab bo‘lgan epizod — Bellingemning urgan golini nishonlashi bo‘ldi. Angliyalik futbolchi golni nishonlar ekan, go‘yo ryumkadan ichimlik ichayaptimi, degandek ishora qildi. Bu harakat ijtimoiy tarmoqlarda bir zumda tarqab ketdi va turli talqinlar paydo bo‘ldi.
Gap shundaki, avvalroq ispaniyalik bloger «AuronPlay» Bellingem haqida alkogol bilan bog‘liq go‘yoki muammolar borligini tilga olgan edi. Tabiiyki, Bellingemning “ryumka” ishorasi ko‘pchilikka aynan shu gaplarga javobdek tuyuldi.
Uchrashuvdan keyin Jud o‘z harakatini izohlab, gap-so‘zlarga nisbatan munosabatini ham ochiq aytdi:
“Odamlar har xil gapiradi. Buning uchun yig‘lash ham, xursand bo‘lish ham mumkin. Men muxlislarga javob qaytardim. Haqiqatni esa o‘zim bilaman”, — dedi Bellingem.
Shu bilan birga, u «Bernabeu»da ba’zi futbolchilarga nisbatan muxlislar reaksiyasi — xususan, hushtaklar va tanqidlar haqida ham to‘xtalib o‘tdi. Bellingem fikricha, muxlislar bunday munosabat bildirishga haqli, chunki ular hafta davomida mehnat qiladi, stadionga kelish uchun pul to‘laydi va o‘z hissiyotini xohlagancha ifoda eta oladi.
“Men doim aytaman: muxlislar butun hafta ishlaydi, bu yerga kelish uchun pul to‘laydi va istagan reaksiyani bildirishga haqli”, — deya ta’kidladi u.
Bellingem ayniqsa Vinisius Junior haqida iliq so‘zlar aytdi. U braziliyalik vingerni hech qachon shubha ostiga olmaganini, muxlislar qo‘llab-quvvatlasa, Vinisius yanada yorqinroq porlashini alohida qayd etdi.
“Vinisius o‘zini a’lo darajada ko‘rsatdi. Men unga hech qachon shubha qilmaganman. Uni qo‘llab-quvvatlashsa, u yanada porlaydi. Muxlislar mehrini his qilganida, u yangi darajaga chiqdi”, — dedi Bellingem «TNT Sports» efirida.
Qisqasi, «Monako»ga qarshi o‘yindagi katta g‘alaba fonida Bellingemning bir ishorasi ham katta mavzuga aylandi. Ammo futbolchi bundan qochmadi — aksincha, “men haqiqatni o‘zim bilaman” degan pozitsiya bilan gaplarga nuqta qo‘yishga urindi.
“Zamin”ni Telegramʻda oʻqing!
