Saudiya Arabistoni chempionati yana katta “ov”ga chiqyapti. Bu gal gap faqat 1-2 ta mashhur futbolchi haqida emas — Yevropada to‘p surayotgan deyarli 50 nafar yulduz o‘yinchi nomzodlar ro‘yxatida ko‘rib chiqilayotgani aytilmoqda.
TalkSport’ga yaqin manbalar va insayder Ben Jeykobs ma’lumotlariga ko‘ra, asosiy nishonlar orasida Muhammad Saloh, Brunu Fernandesh, Vinisius, Robert Levandovski va Kazemiro kabi katta nomlar bor. Ya’ni, Saudiya ligasi “trend” uchun emas — haqiqiy super-brendlar uchun kelishyapti.
Bu rejaning ortida ham aniq mantiq bor. Saudiyaliklar 2027 yilda Krishtianu Ronalduning ketishi (yoki faoliyatini yakunlashi) fonida liga atrofidagi qiziqish pasayib ketmasligini xohlayapti. Qisqasi, Ronaldu ketsa ham, stadionlar va efirlar “sukunat rejimi”ga tushib qolmasligi kerak.
Shu bilan birga, yana bir qiziq variant ham muhokamada ekani aytilyapti: Krishtianuni “An-Nasr”dagi ulushini oshirish orqali klubning hammuassisi sifatida faolroq jalb qilish. Ya’ni, maydondagi Ronaldu kamaysa, kabinetdagi Ronaldu ko‘payishi mumkin — brendni saqlab qolishning “professional layfxak”i, desak ham bo‘ladi.
Xulosa bitta: Saudiya ligasi keyingi davrga jiddiy tayyorgarlik ko‘ryapti. Endi savol shunchaki — qaysi yulduzlar bu chaqiruvga “ha” deb javob beradi? Muxlislar uchun esa intriga tayyor: yozgi transfer oynasi bu yil odatdagidan ham qiziq bo‘lishi mumkin.
“Zamin”ni Telegramʻda oʻqing!
