Abdusattorov Gukeshni mag‘lub etdi: yakunda "shok"li xato ro‘y berdi...

Nodirbek Abdusattorov jahon chempioni Gukesh ustidan qo‘lga kiritilgan juda muhim g‘alabadan keyin matbuot oldida fikrlari bilan o‘rtoqlashdi. Uchrashuv oxiridagi keskinlik, vaqt tanqisligi va kutilmagan xatolar partiyani tom ma’nodagi dramatik ssenariyga aylantirdi.

Abdusattorov avvalo raqibiga nisbatan inson sifatida hamdardlik bildirib o‘tdi. Uning aytishicha, bunday “og‘ir tuyg‘u”ni o‘zi ham ko‘p bor his qilgan, shu bois Gukeshning holatini yaxshi tushunadi.

— Men unga chindan ham achinaman. Bu juda og‘ir his. O‘zim ham bunday vaziyatga ko‘p marta tushganman. Umuman olganda, partiya oddiy tartibda ketayotgandi. Bir payt u haddan tashqari ruhlanib, o‘yin tempini tezlatishga urindi, lekin men vaziyatni nazoratda ushlab turdim. Menga durang uchun yetarli imkoniyat bordek tuyulardi. Yakunga yaqin uning vaqti kamaydi, u asabiylashdi va qo‘pol xatoga yo‘l qo‘ydi, — dedi Nodirbek.

Intervyuda partiyaning oxirida ko‘p muhokama bo‘lgan Rg5 yurishi ham tilga olindi. Abdusattorov bu epizodni izohlash oson emasligini ta’kidladi.

— Buni tushuntirish qiyin. Go‘yo izohga ham sig‘maydigan navbatdagi yurish. O‘ylayman, bu turnirning ayni birinchi turidayoq shunday dag‘al xatolar ko‘p ko‘rindi. Ungacha bu darajadagi xatolar tushgan partiyalarni ham eslay olmayman. Bu uchrashuv esa eng yorqin misollardan biri bo‘ldi. Yakun mutlaqo shokli chiqdi, — dedi u.

Suhbat davomida Nodirbekning shaxmatdan tashqari faolligi — jismoniy tayyorgarlik va padelga qiziqishi ham muhokama qilindi. Uning aytishicha, bir necha kun oldin padel o‘ynagan bo‘lsa-da, keyinroq yana o‘ynashga ulgurmagan.

— Yo‘q, ulgurmadim. Yana ikki kishi topib, to‘rt kishi bo‘lib o‘ynamoqchi edik, lekin amalga oshmadi, — deydi Abdusattorov.

Sherik masalasida esa u hazilomuz, lekin ochiq chaqiriq ham qildi:

— Albatta, hali ham sherik izlayapman. Agar kimdir ko‘rib qolsa va o‘ynashni istasa — men tayyorman.

Dam olish kuni haqida gapirgan Nodirbek rejimi oddiy, lekin samarali ekanini aytdi: tushlik, zal, keyin esa tiklanish.

— Beverveykka borib tushlik qildim, keyin zalga kirib, biroz mashq qildim. Qolgan vaqtda dam oldim va tiklandim, — dedi u.

Uzoq turnirlarda jismoniy holatning ahamiyatiga to‘xtalgan Abdusattorov “uzoq masofa”da barqaror bo‘lish uchun faollik shartligini ta’kidladi.

— Turnir juda uzoq. Shuning uchun jismoniy faollik kerak. Har kimning o‘z yo‘li bor. O‘zimni yaxshi his qilsam — zalga boraman, mashq qilaman. Qolgan paytda esa dam olaman, — dedi grossmeyster.

Eng qiziq nuqta — turnir ekvatoriga kelgandagi kayfiyat. Nodirbek hozirgi natija yoqimli ekanini yashirmadi, biroq shu g‘alabaning o‘zi ham unga “yana yaxshiroq o‘ynash kerak” degan signal bo‘lganini ochiq aytdi.

— Bunday “sovg‘ali” g‘alabadan keyin, albatta, kayfiyat yaxshi. Lekin bu menga o‘yinimni yana kuchaytirishim shartligini ham ko‘rsatadi. Bugungi partiyadan to‘liq qoniqmadim. Shunga qaramay, keyingi bahslarda yanada yaxshiroq o‘ynashga harakat qilaman, — deya xulosa qildi Abdusattorov.

Bir so‘z bilan aytganda, Nodirbek g‘alaba qildi, ammo “har narsa zo‘r” deb ketmadi — aksincha, o‘ziga talabni yanada oshirdi. Shu kayfiyat bilan ketsa, turnirning ikkinchi qismida yana katta gaplar bo‘lishi mumkin.