Gvardiola Xolandning yuklamasi haqida aniq javob berdi
35
“Manchester Siti” bosh murabbiyi Xosep Gvardiola matbuot anjumanida Erling Xolandning maydonda juda ko‘p vaqt o‘tkazayotgani haqidagi savolga keskin va ochiq tarzda javob qaytardi. Pepning fikricha, bu mavzuda qayta-qayta gap ochishdan katta foyda yo‘q — chunki hozirgi futbol realligi barcha jamoalarni bir xil bosim ostiga qo‘ymoqda.
— Nega biz bu mavzularni yana bir bor muhokama qilamiz? Hech narsa o‘zgarmaydi, — dedi Gvardiola.
U misol sifatida “Siti”ning “Budyo-Glimt”ga qarshi o‘yinini eslab o‘tdi: o‘sha bahsda jamoa tarkibida 11 nafar futbolchi yo‘q bo‘lgan. Pep bu holat faqat manchesterliklarga xos emasligini ham ta’kidladi. Uning aytishicha, “Aston Villa”, “Tottenxem” kabi klublarda ham jarohatlar ko‘paygan, chunki taqvim haddan tashqari tig‘iz.
Gvardiola bugungi futbolda yuklama oshgani tabiiy ekanini aytib, Xoland bunday tempga mos keladigan o‘yinchi ekaniga ishora qildi:
— Jamoalar ko‘p uchrashuv o‘tkazyapti. Xolandning jismoniy imkoniyatlari bor va u bu yuklamani ko‘tara oladi, — dedi u.
Ayni paytda “Manchester Siti” Angliya Premer-ligasida 2-o‘rinni egallab turibdi. “Shaharliklar” peshqadam “Arsenal”dan 7 ochko orqada bormoqda. Demak, Pep uchun hozirgi eng katta “drama” — Xolandning qancha o‘ynayotgani emas, balki chempionlik poygasidagi har bir ochkoning qiymati.
“Zamin”ni Telegramʻda oʻqing! 
