Chempionlar ligasida “Barselona” o‘z uyida “Kopenhagen”ni 4:1 hisobida mag‘lub etganidan keyin jamoa bosh murabbiyi Hans-Diter Flik o‘yin va shaxsiy statistikasi haqida fikr bildirdi. Kataloniyaliklar uchun bu natija navbatdagi muhim qadam bo‘lsa, murabbiyning so‘zlaridan bilindiki, u g‘alabadan ham ko‘ra — rivojlanish va talabchanlikka ko‘proq urg‘u beryapti.
Qayd etish kerak, aynan shu o‘yin Flik qo‘l ostidagi “Barselona”ning 70-g‘alabasi sifatida tarixga kirdi. E’tiborlisi, bu ko‘rsatkichga yetib kelish uchun jamoaga 93 ta uchrashuvning o‘zi yetarli bo‘lgan. Ko‘pchilik uchun bu — juda kuchli raqam. Ammo Flik buni “vau” deb qabul qilmadi.
“Men klub bilan 93 ta o‘yinda 70 marta g‘alaba qozondim? Bu yetarlicha yaxshi ko‘rsatkich emas. Men har o‘yinda g‘alaba qozonishni istayman, ammo bu deyarli imkonsiz ekanini ham tushunaman”, — degan nemis mutaxassisi.
Flikning bu gapida oddiy bir mantiq bor: u o‘zini ham, jamoasini ham “komfort zona”da ushlab turishni istamaydi. G‘alaba kelsa ham — “keyin nima?” degan savol unda doim birinchi o‘rinda. Shuning uchun u 70 g‘alabani maqtov sifatida emas, navbatdagi vazifalar uchun asos sifatida ko‘ryapti.
Murabbiy yana bir jihatga ham alohida to‘xtaldi — statistikaga bo‘lgan munosabat. Flik o‘z uslubida bu masalada ham ochiq gapirdi:
“Siz ham bilasiz, men statistika tarafdori emasman. Shuning uchun unga to‘liq tayanmayman. Ha, ba’zan statistikaga e’tibor qilaman, ammo doimo emas”, — deya uning so‘zlarini keltirdi BarcaTimes.
Ya’ni, u raqamlarni inkor qilmayapti, lekin ularni “asosiy haqiqat” deb ham bilmaydi. Flik uchun muhimrog‘i — maydondagi sifati, jamoaning intizomi, o‘yin sur’ati va har bir uchrashuvda qay darajada o‘sish borligi.
Qisqasi, “Kopenhagen” ustidan katta hisobdagi g‘alaba ham, 93 o‘yindagi 70 zafar ham Flikni “to‘xtatib qo‘ymadi”. Uning kayfiyati bitta: “yanada yaxshiroq bo‘lish kerak”. Muxlislarga yoqadigan tomoni ham shu — jamoada talabchanlik baland bo‘lsa, katta o‘yinlarda katta natijalarga yo‘l ochiladi.
“Zamin”ni Telegramʻda oʻqing!
