Yevropa Ligasida ham umumiy bosqich o‘zining so‘nggi — 8-tur o‘yinlari bilan yakunlandi. Oxirgi tur o‘yinlari muxlislarga aynan kutilgan tomoshani berdi: gollar “yog‘di”, dramatik burilishlar bo‘ldi, ayrim jamoalar esa so‘nggi daqiqalarda taqdirini hal qildi.
Bu gal peshqadamlar — «Lion» va «Aston Villa» yana bir bor “hech kim zerikmaydi” degan ssenariyni ishga tushirdi. Ayniqsa Emeri boshchiligidagi «Aston Villa»ning kambeki ko‘pchilikni lol qoldirdi: jamoa 0:2 hisobida ortda qolgan paytda ham ruhan sinmadi va o‘yinni 3:2ga aylantirib, g‘alabani “o‘g‘irlab” emas, haqiqiy xarakter evaziga olib qo‘ydi. «Zalsburg»ga qarshi bahsda Rojers, Mingz va Jimo gollari g‘alabaning kaliti bo‘ldi.
Aston Villa — Zalsburg 3:2
Gollar: Rojers (65), Mingz (76), Jimo (87) — Konate (33), Yeo (49).
«Betis»da esa Antoni nomini alohida tilga olish kerak. Uning maydondagi harakatlari, “pushka”dek zarbasi va assisti jamoaga katta turtki berdi. Natijada «Feyenoord» ustidan 2:1 hisobidagi g‘alaba qo‘lga kiritildi va sevilyaliklar to‘g‘ridan to‘g‘ri 1/8 finalga chiqqan 8 jamoa orasiga kirishni uddaladi. Bu — so‘nggi turda “reja”ni sof bajargan jamoalardan biri degani.
Betis — Feyenoord 2:1
Gollar: Antoni (17), Ezzalzuli (32) — Tengstedt (77).
Yana bir prinsipial kurash Gretsiyada kuzatildi: «Roma» «Panatinaikos»ga qarshi o‘yinda erta — 15-daqiqada Manchini chetlatilib, italiyaliklar 10 kishi bo‘lib qoldi. Shunga qaramay, rimliklar yiqilmadi: 1:1 hisobida durang qayd etib, top-8da qolish uchun kerak bo‘lgan natijani “tish-tirnoq” bilan ushlab qoldi. Futbolda ba’zan g‘alaba emas, ana shunday durang ham chempionlarcha xarakter hisoblanadi.
Panatinaikos — Roma 1:1
Gollar: Taborda (58) — Ziolkovski (80).
Chetlatish: Manchini (15, Roma).
Turning yana bir sergol o‘yinida «Lion» PAOK bilan to‘qnash kelib, 4:2 hisobida yutib chiqdi. Bu bahsda ham temp baland, gollar esa bir-birini quvib keldi. Hatto «Lion» penaltidan foydalana olmadi, lekin baribir yakunda ustunlikni o‘zida saqlab qoldi.
Lion — PAOK 4:2
Gollar: Himbert (34), Merah (55), Karabes (88), Gomes (90+3) — Yakumakis (20), Meyte (67).
Foydalanilmagan penalti: Karabes (83, Lion).
Chetlatish: Konstantelias (41, PAOK).
Shu orada ayrim tanish nomlar “to‘g‘ridan to‘g‘ri 1/8 final” o‘rniga qo‘shimcha pley-off bosqichiga tushib qoldi. «Nottinghem Forest», «Fenerbahche», «Lill» kabi klublar endi yo‘lni bir oz uzaytirib, o‘tish o‘yinlari orqali davom etishga majbur bo‘ladi. «Forest»ning 4:0 hisobidagi yirik g‘alabasi bor, ammo umumiy vaziyatga ko‘ra ularga ham pley-off “zinasi”dan chiqish to‘g‘ri keldi. «Lill» esa juda og‘ir o‘yinda 90+2-daqiqada penalti hisobidan g‘alaba topdi — bunday uch ochko keyin turnir taqdiriga ham ta’sir qilishi mumkin.
Nottinghem Forest — Ferensvarosh 4:0
Gollar: Otvos (17, avtogol), Jezus (21, 55), Makeyti (90, penalti).
Lill — Frayburg 1:0
Gol: Jir-u (90+2, penalti).
Chetlatish: Eggeshtayn (74, Frayburg).
Qolgan o‘yinlarda quyidagi natijalar qayd etildi:
Srvena Zvezda — Selta 1:1
Gollar: Duarte (89) — Lopes (87).
Makkabi Tel-Aviv — Bolonya 0:3
Gollar: Rou (35), Orsolini (47), Pobega (90+4).
Gou Ehed Iglz — Braga 0:0
Shtutgart — Yang Boyz 3:2
Gollar: Undav (6), Demirovich (7), Andres (90) — Gigovich (42), Lauper (57).
Midtyulland — Dinamo Zagreb 2:0
Gollar: Simsir (49), Bak (74).
Bazel — Viktoriya Plzen 0:1
Gol: Panos (39).
Seltik — Utrext 4:2
Gollar: Nyugren (6), Virgever (10, avtogol), Engels (19, penalti), Trasti (66) — de Vit (44), Bleyk (62).
Ludogores — Nitssa 1:0
Gol: Stanich (42).
Shturm — Brann 1:0
Gol: Kitemshvili (85).
Genk — Malmyo 2:1
Gollar: Heymans (45, penalti), Karetsas (82) — Ali (4).
Yevropa Ligasi 8-turidan keyingi musobaqa jadvali:
Qisqasi, Yevropa Ligasining umumiy bosqichi oxirida intriga o‘z kuchida qoldi: bir tarafda to‘g‘ridan to‘g‘ri 1/8 finalga chiqqanlar, ikkinchi tarafda esa qo‘shimcha bosqichda “tirik qolish” uchun kurashadiganlar. Endi eng qizig‘i boshlanyapti — pley-offda xatoga joy yo‘q, bir epizod butun mavsumni yoritib yuborishi ham, o‘chirib tashlashi ham mumkin.
“Zamin”ni Telegramʻda oʻqing!
