Londonning Chelsi bosh murabbiyi Liam Rosenor jamoadagi muhit, futbolchilar bilan ishlash jarayoni va o‘z g‘oyalarini maydonga “ko‘chirish” haqida fikr bildirdi. Uning aytishicha, futbolchilar bilan ishlash yoqimli — tarkib trenirovka va o‘yin rejasiga chindan ham qo‘shilib ketgan, jamoa qilinayotgan ishga ishonib turibdi.
Murabbiyning asosiy nuqtasi esa shunday: g‘oyani to‘liq singdirish uchun natija kerak. Chunki futbolda g‘alabalar — murabbiyning “ovozi balandroq chiqadigan mikrofoni”. Shu sababli Rosenor har bir o‘yinda imkoniyat boricha yutish uchun kurashish shartligini ta’kidladi.
U jamoa haqida hozircha salbiy gap aytolmasligini ham ochiq bildirdi: futbolchilar yosh, salohiyatli, eng muhimi — o‘rganish va o‘sishni xohlaydi. Bu esa murabbiy uchun eng yaxshi signal: “demak, material bor, endi to‘g‘ri ishlash kerak”. Rosenor har bir o‘yinchini yaxshiroq tanish, nimasi ruhlantirishini tushunish muhimligini aytdi — kimgadir ko‘proq e’tibor kerak, boshqasini esa ortiqcha “bosim” bilan bezovta qilmaslik ma’qul. Qisqasi, har bir futbolchidan maksimum olish — murabbiyning vazifasi.
Ayni paytda “aristokratlar” Angliya Premer-ligasi jadvalida 37 ochko bilan beshinchi o‘rinda bormoqda.
Endi eng qizig‘i kelajakda: agar Rosenor aytgan “g‘alaba — ishonchni tezlashtiradigan yoqilg‘i” formulasi ishlasa, bu jamoa tezroq o‘sadi. Agar ishlamasa… futbolda “g‘oya” emas, tablodagi raqamlar gapiradi. Shuning uchun “Chelsi” uchun har bir o‘yin — nafaqat 3 ochko, balki yangi loyihaning tezlik sinovi ham.
“Zamin”ni Telegramʻda oʻqing!
