Kataloniyaning «Barselona» klubi o‘z rasmiy sahifalari orqali Joan Laporta prezidentlik lavozimini tark etganini ma’lum qildi. Bu qaror bugun bo‘lib o‘tgan direktorlar kengashi yig‘inida rasmiylashtirildi va klubdagi prezidentlik saylovi jarayoni bilan bevosita bog‘liq.
Gap shundaki, klub nizomiga ko‘ra amaldagi prezident qayta saylovda qatnashish uchun vazifasini vaqtincha bo‘shatishi kerak. Shu sababli Laportaning iste’fosi “favqulodda shov-shuv” emas, balki saylovga kirishish uchun zarur protsedura sifatida talqin qilinmoqda.
Endilikda klub rahbarligi vaqtincha birinchi vitse-prezident Rafael Yuste qo‘liga o‘tadi. U saylovlar yakunlanib, yangi rahbar aniq bo‘lguncha klubdagi kundalik boshqaruv barqarorligini ushlab turishi kerak bo‘ladi.
Ma’lumot uchun, «Barselona» prezidenti saylovi 2026-yil 15-mart kuni bo‘lib o‘tadi. Aynan shu sana klub “yangi davr”ga qaysi qadam bilan kirishini hal qiladi: muxlislar va klubning rasmiy a’zolari qaysi yo‘lni tanlaydi — davomiylikmi yoki keskin yangilanishmi?
Qisqasi, klubda hozir “tanaffus” emas — saylov kayfiyati boshlandi. Endi eng qiziq qismi: kimlar qanday dastur bilan chiqadi va mart oyida «Barsa» rulda kimni ko‘radi.
“Zamin”ni Telegramʻda oʻqing!
