2025-yil yanvar oyida “Manchester Siti” tarkibni yanada “zich” qilish, raqobatni baland nuqtaga olib chiqish maqsadida qator yangi futbolchilarni safiga qo‘shgan edi. Ular orasida Abduqodir Husanov, Niko Gonsales, Vitor Reys va misrlik hujumchi Umarni Marmush ham bor. Oradan bir yil o‘tib, shu transferlarning qay biri haqiqatan ham asosiy tarkib darajasiga “pishgani” asta-sekin ko‘rinib bormoqda.
Hozir esa eng qiziq syujet hujum chizig‘ida. Sababi oddiy: raqobat qattiq. “Siti”da oldingi chiziqdagi kurash shunchalik qizib ketdiki, yangi kelgan Antuan Semeno ham o‘z o‘rnini talab qilyapti, Jeremi Dok-u esa o‘yinini ancha “ochib” yubordi. Ana shu omillar ortidan Marmushning maydondagi daqiqalari qisqarishi ehtimoli bor. Futbolda esa vaqt — pul, daqiqa — obro‘.
Shu holatni Yevropaning bir qator klublari diqqat bilan kuzatyapti. The Touchline nashri bergan ma’lumotlarga ko‘ra, 26 yoshli hujumchini qishning o‘zidayoq olib ketishga tayyor turganlar bor. Ro‘yxat ham “mazali”: Turkiyadan “Fenerbahche” va “Galatasaroy”, Angliyadan “Tottenxem”, Ispaniyadan “Atletiko”, Italiyadan esa “Milan” Marmushga qiziqish bildiryapti. Ya’ni, bu yerda gap shunchaki mish-mish haqida emas — jiddiy monitoring ketyapti.
Lekin masalaning ikkinchi tomoni ham bor: Xosep Gvardiola Marmushni mavsum o‘rtasida qo‘yib yuborish tarafdori emas. Mutaxassis hujumchi Erling Xolandga tushayotgan yukning bir qismini ko‘tarishini, zarur paytda “almashtiruvchi motor” bo‘lib berishini istaydi. Qisqasi, Gvardiola uchun Marmush — faqat zaxira emas, balki kerakli resurs.
Shunga qaramay, vaziyat bir nuqtada kesishadi: agar Marmushning o‘zi ketish istagini ochiq bildirsa, klub rahbariyati bu masalani yozgi transferlar oynasida ko‘rib chiqishga tayyor. Ya’ni hozircha “qishda yo‘q”, lekin yozda eshik yopiq emas.
Transfermarkt mutaxassislari esa misrlik hujumchining transfer qiymatini 65 million yevro deb baholagan. Bu summa ham Marmush atrofidagi qiziqish nega buncha kuchli ekanini tushuntiradi: bozorda bunday narx — “o‘yinchiga ishonamiz” degan signal.
Xulosa bitta: “Siti”da hujum chizig‘i yangi mavsumda yanada yonib ketishi mumkin. Marmush esa oldida tanlov: asosiy tarkib uchun qattiq kurash va Xolandga yelkadosh bo‘lish yoki Yevropaning boshqa grandlaridan birida yangi sahifa ochish. Qaysi variant bo‘lmasin, bu hikoya hali uzoq davom etadi — serialning yangi qismi yozda chiqadi.
“Zamin”ni Telegramʻda oʻqing!
