Krishtianu Ronaldu 41 yoshga to'ldi. Afsonaviy maqomiga qaramay, u endi Yevropaning eng kuchli chempionatlarida to'p surmayapti: hujumchi faoliyatini Saudiya Arabistonida davom ettirmoqda va 1000 gol marrasiga tobora yaqinlashyapti. Bu haqda euro-football.ru xabar beradi.
Shu bilan birga, Yevropaning beshta top ligasi — Angliya Premyer-ligasi, La Liga, A Seriya, Bundesliga va Liga 1 —da Ronaldundan ham yoshi katta bo'lgan atigi ikki futbolchi hanuz maydonga tushmoqda.
Dante (Nissa, Fransiya)
Har mavsum “oltin veteranlar” ro'yxatiga qaralsa, bir savol yana qaytadi: braziliyalik himoyachi Dante hali ham safdami? Ha, u hanuz Nissa libosida.
Dante 42 yoshda (tug'ilgan kuni oktyabrda), biroq baribir jamoa uchun muhim figura bo'lib qolmoqda. U endi har doim asosiy tarkibda tushmaydi: mavsum davomida Liga 1 va Yevropa Ligasida jami 8 o'yinda qatnashdi, shundan 5 tasida startdan maydonga chiqdi. Ko'proq tajribasi bilan kiyinish xonasida yetakchilik vazifasini bajarmoqda.
Eng qizig'i, u 37 yoshida tizzasining xochsimon bog'lami uzilgan og'ir jarohatni boshdan kechirgan — ko'p futbolchilar aynan shundan keyin karyerasini yakunlaydi. Dante esa taslim bo'lmadi.
“22 yildan beri professionallikdaman, motivatsiya hanuz yonimda. Sababi oddiy: men futbolni sevaman”, deydi himoyachi.
Santi Kasorla (Real Ovyedo, Ispaniya)
O'z avlodining eng hurmatga sazovor va kamtarona yulduzlaridan biri bo'lgan Santi Kasorlaning katta futboldagi yana bir sahifasi deyarli mo'jizaga o'xshaydi.
Arsenaldan ketganidan keyin Vilyarrealda yorqin qaytish, so'ng Qatardagi uch yil va karyera yakuni yaqinlashgandek tuyulgandi. Biroq 2023 yilda Kasorla bolalikdan muxlisi bo'lgan, o'zi tug'ilib-o'sgan shahar klubi — ikkinchi diviziondagi Real Ovyedo bilan shartnoma imzoladi.
“Men tekin ham o'ynagan bo'lardim, lekin bu taqiqlangan”, degan u The Guardian'ga.
“Xotinim: ‘Sen pul uchun emas, uyga qaytyapsan — zavqlanish, yordam berish, borini berish uchun’, dedi. Men agentimga qo'ng'iroq qilib, menga pul kerak emasligini aytdim. Klub prezidentiga esa: ‘Minimal maosh, futbolkam savdosining 10 foizi akademiyaga’ dedim. Hammasini o'sha kechaning o'zida hal qildik. Bu biznes emas, muhabbat hikoyasi edi”, — deya eslagan Kasorla.
40 yoshida, Ovyedodagi ikkinchi mavsumida u pley-offda gol urib, jamoaga 24 yildan keyin La Ligaga qaytishga yordam berdi.
La Ligaga qaytish oson kechmayapti: klub allaqachon ikki murabbiy bilan xayrlashdi, uy o'yinlarida esa butun mavsum davomida atigi to'rtta gol urildi. Shunga qaramay, Kasorlaning maydondagi o'ziyoq jamoaga ruh va ishonch berayotgani seziladi.
Xulosa
Ronaldu futbol tarixidagi gigantlardan biri, ammo u Yevropaning katta sahnasini allaqachon tark etgan. Dante va Kasorla esa — rol jihatdan kamtarroq bo'lsa-da — Yevropa futbolida hozir ham o'z izini qoldirishda davom etyapti.
Ular yana bir bor isbotlamoqda: yosh faqat raqam, o'yinga bo'lgan ishtiyoq esa muddat tanlamaydi.
“Zamin”ni Telegramʻda oʻqing!
