APL doirasidagi markaziy bahslardan biri — «Chelsi» — «Lids» to‘qnashuvi 2:2 hisobida yakunlandi. Londonliklar o‘yinni juda ishonchli boshlab, 2:0 hisobida oldinga chiqib olgan bo‘lsa-da, yakunda g‘alabani qo‘lda ushlab qolishning iloji bo‘lmadi. Muxlislar uchun esa bu uchrashuv “bitdi” degan joyda yana qayta jonlanib ketgan dramatik kechaga aylandi.
«Ko‘klar» birinchi bo‘limda raqibni bosim ostida ushlab turdi. 24-daqiqada Joao Pedro hisobni ochib, «Stemford Bridj»ni quvonchga to‘ldirdi. Ikkinchi bo‘limda ham «Chelsi» tempni pasaytirmadi: 58-daqiqada Koul Palmer o‘z uslubida hal qiluvchi zarbani yo‘llab, jamoasini 2:0 hisobida oldinga olib chiqdi. O‘sha paytda ko‘pchilik “tamom, o‘yin yopildi” deb o‘ylagandir.
Biroq futbolda eng xavfli daqiqalar — aynan ishonch paydo bo‘lgan daqiqalar, shekilli.
«Lids» taslim bo‘lmadi va qisqa vaqt ichida vaziyatni butunlay o‘zgartirib yubordi. 67-daqiqada Lukas Nmecha aniq zarba bilan intrigani qayta tiriltirdi. Oradan olti daqiqa o‘tmay, 73-daqiqada Noa Okafor ham “o‘z so‘zini” aytib, hisobni tenglashtirdi — 2:2. Shu ikki zarba «Chelsi» uchun sovuq dush, «Lids» uchun esa qutqaruv halqasi bo‘ldi.
Uchrashuvdan so‘ng «Chelsi» ustozi Liam Rosenior jamoa ochkolarni o‘z qo‘li bilan boy berganini yashirmadi. Uning ta’kidlashicha, barchasi olti daqiqa ichidagi ikki epizodda hal bo‘lgan:
«Hammasini olti daqiqa ichidagi ikki vaziyat hal qildi. Biz g‘alaba qozonishimiz shart edi, ammo aynan shu ikki epizod sabab ikki ochkoni yo‘qotdik. «Lids»ga durangni o‘zimiz sovg‘a qildik. Muhim pallalarda xatoga yo‘l qo‘ysangiz, futbolda hamma narsa sodir bo‘lishi mumkin. O‘yin davomida, o‘sha qisqa oraliqdan tashqari, biz yaxshiroq jamoa edik. Bunday holat takrorlanmasligi kerak. Ayrim jihatlarni futbolchilar bilan muhokama qilaman», — deya murabbiyning so‘zlarini BBC keltiradi.
Shu tariqa, 26-turdan so‘ng «Chelsi» 44 ochko bilan APL turnir jadvalida 5-o‘rinda qolmoqda. Ammo bu durang jamoaga bitta haqiqatni yana bir bor eslatdi: 2:0 ham hali hech narsa emas — agar oxirgi daqiqalarda diqqat va sovuqqonlik yo‘qolsa, raqib ham “qaytmaydi” deb o‘ylash katta xato.
“Zamin”ni Telegramʻda oʻqing!
