Fransiyaning «Lion» klubi bosh murabbiyi Paulu Fonseka «Nant»ga qarshi o‘yinda braziliyalik hujumchi Endrik qizil kartochka olgan epizod yuzasidan fikr bildirdi. 19 yoshli futbolchi «Real»dan ijara asosida «Lion» safida to‘p surmoqda. Bu haqda euro-football.ru xabar beradi.
Fonseka jazoni haddan tashqari og‘ir deb hisoblaydi. Uning aytishicha, qizil kartochkadan avval Endrikka nisbatan yaqqol qoida buzilishi bo‘lgan: «Nant» futbolchisi to‘pga o‘ynashga urinmay, faqat Endrikni to‘xtatishga harakat qilgan. Murabbiy, shuningdek, ketma-ket uchinchi o‘yindirki, raqiblar Endrikni asabiylashtirish uchun boshidan bosim va keskinlikni kuchaytirayotganini ta’kidladi hamda hakamlar bunday darajada iqtidorli futbolchini himoya qilishi kerakligini aytdi.
Shu bilan birga, Fonseka Endrikning o‘zi ham xulosa chiqarishi lozimligini qayd etdi. Murabbiy yosh hujumchiga hozir barcha e’tibor unga qaratilganini eslatgan, 19 yoshida katta salohiyatga ega futbolchi bunday vaziyatlarda ehtiyotkorroq bo‘lishi zarurligini aytgan. Uning fikricha, aynan shunday murakkab pallalar va sinovlar Endrikning yanada ulg‘ayishiga yordam beradi.
Fonseka hakamlar qarorlari bir haftadan boshqasiga keskin farq qilayotgani ham uni hayratga solayotganini qo‘shimcha qildi. U qaysi holat qizil kartochkaga, qaysi epizod sariq kartochkaga tortilishini aniqroq belgilash kerakligini, hozirgi talqinlar juda turlicha ekanini urg‘uladi.
Endrik «Lion» safida o‘tkazgan 5 uchrashuvda 5 ta gol urdi va 1 ta golli uzatma berdi.
“Zamin”ni Telegramʻda oʻqing!
