«Tottenxem Xotspur», «Nottingem Forest» kabi jamoalarda ishlagan, futbol muhitining “ichi-tashini” yaxshi biladigan murabbiylardan biri — Ange Postekoglu «Manchester Yunayted» haqida gapirib, gapni aylantirmay to‘g‘ridan to‘g‘ri qo‘ydi: bu klubga oddiy emas, aynan “o‘ziga xos” murabbiy kerak.
Uning ta’kidlashicha, dunyo futbolidagi eng og‘ir vazifalardan biri — aynan «Manchester Yunayted»ni boshqarish. Sababi oddiy: bu klub doim kameralar, sarlavhalar va muhokamalar markazida. Bir narsa bo‘lsa — butun dunyo muhokama qiladi. Ikkinchi narsa bo‘lsa — yana ham shovqin.
Postekoglu fikricha, «Yunayted»ga keladigan murabbiy “hammasini bitta kunda tuzataman” degan kayfiyatda emas, uzoq yo‘lga tayyor bo‘lishi shart. Ya’ni: biz shu tizimni tanlaymiz, shu tartib-intizomga amal qilamiz va bir necha yil shu yo‘ldan qaytmaymiz, deb ayta oladigan inson kerak. Qisqa muddatli “tez natija” ortidan quvish bu yerda ish bermasligi mumkin.
Eng qizig‘i, u murabbiyning faqat maydondagi taktikasi emas, “matbuotdagi janglari” ham muhimligini urg‘uladi. Chunki «Yunayted»da bir yilda 100 tadan ham ko‘p matbuot anjumanlari, savol-javoblar, bosim va tanqidlar bo‘ladi. Bunday vaziyatda rahbarlikka kelgan inson qattiq gaplarni og‘ir qabul qilmay, ruhan sinmay, aksincha “men buni qila olaman, o‘zim qilaman” degan ishonch bilan tura olishi kerak.
Xulosa bitta: «Manchester Yunayted»ga oddiy murabbiy emas — temir asabli, uzoq rejali va o‘ziga xos xarakterli lider kerak. Chunki bu klubda nafaqat o‘yin, balki har kuni piar-maydon ham “derbi”.
“Zamin”ni Telegramʻda oʻqing!
