“Barselona” “Levante” ustidan kutilganidek yirik hisobda g‘alaba qozonib, La Ligada yana birinchi o‘ringa ko‘tarildi va “Real”ni ortda qoldirdi. Uchrashuvning yana bir xushxabari — jarohatdan keyin Pedrining safga qaytishi bo‘ldi: u 66-daqiqada maydonga tushdi. Bu haqda euro-football.ru xabar beradi.
Biroq bu safar hal qiluvchi rolni na Pedri, na Yamal bajardi, Rafin’ya va Levandovski esa gollar borasida jamoani oldinga torta olmadi. G‘alabaning asosiy poydevori boshqa futbolchilarning yorqin o‘yini va tizimli ustunlik bo‘ldi.
O‘yin protokoli shuni ko‘rsatdi: “Barselona”ning gollari 4-daqiqada Mark Bernal, 32-daqiqada Frenki de Yong va 81-daqiqada Fermin Lopes tomonidan urildi — 3:0. Shu tariqa kataloniyaliklar “Kamp Nou Spotify”da (Toshkent vaqti bilan) raqibni to‘liq nazorat ostida ushlab, yetakchilikni qaytarib oldi.
Uchrashuvdagi eng ko‘zga ko‘ringanlardan biri Fermin Lopes bo‘ldi. Zaxiradan maydonga tushgan yarim himoyachi qisqa vaqt ichida o‘yin ritmiga ta’sir ko‘rsatdi: Yamal bilan bir necha xavfli vaziyatlarni uyushtirdi va burchakdan uzatilgan to‘pdan keyin chiroyli gol urdi. Mualliflar bahosiga ko‘ra, u 7,5 ballga loyiq ko‘rildi.
Mark Bernal esa 8,0 ball oldi. 4-daqiqadagi tezkor gol bilan hisobni ochgan futbolchi paslarda deyarli xatosiz o‘ynadi, maydon markazida ishonchli harakat qildi va jamoaning ustunligini boshlab berdi. Uni 66-daqiqada almashtirish qarori esa savol uyg‘otdi.
Joau Kanselu (8,5) “Barselona” hujumlarining asosiy “dvigateli” bo‘ldi: u qanotdan tez-tez yorib kirib, keskin uzatmalar berdi, bir nechta golli vaziyat yaratdi va De Yongning golida assist qayd etdi. Aniqroq yakunlash bo‘lganida, Kanseluning statistikasida yana ham ko‘proq natija ko‘rinishi mumkin edi.
Frenki de Yong (8,5) esa Kanseluning uzatmasini bir teginishda golga aylantirib, jamoaning ikkinchi golini urdi. U maydon markazida o‘yinni boshqardi, ko‘plab aniq paslar bilan tempni nazorat qildi, pressingda ham foydali ishladi va deyarli to‘p yo‘qotmadi.
“Zamin”ni Telegramʻda oʻqing!
