Madridning “Atletiko” klubida katta o‘zgarishlar bo‘lishi haqidagi gap-so‘zlar yana avj oldi. El Chiringuito nashri tarqatayotgan xabarga ko‘ra, bosh murabbiy Diyego Simeone Milanning “Inter” klubi bilan shaxsiy shartnoma shartlari bo‘yicha kelishuvga erishgan va mavsum yakunida Italiya klubini boshqarishi mumkin.
Manba ta’kidlashicha, bu kelishuv La Liganing 25-turida “Atletiko” “Espanol”ni 4:2 hisobida mag‘lub etgan uchrashuvdan keyin amalga oshgan. Aytilishicha, “Inter” argentinalik mutaxassisga 1 yillik shartnoma taklif qilishga tayyor.
Avvalroq esa Simeone bilan “Atletiko”ning sport direktori Mateu Alemani o‘rtasidagi munosabatlar qishki transfer oynasidan keyin sovugani, klub esa ehtimoliy ravishda yangi bosh murabbiy qidira boshlagani haqida ham xabarlar tarqalgandi. Shu fon ortida “Simeone davri tugayaptimi?” degan savol yana kun tartibiga chiqdi.
Eslatib o‘tamiz, Diyego Simeone 2011 yil dekabridan beri “matraschilar”ni boshqarib kelmoqda. Uning qo‘l ostida “Atletiko” ikki marta Ispaniya chempioni bo‘lgan, shuningdek Yevropa Ligasi kubogini ham qo‘lga kiritgan. Qisqasi, bu — bir necha o‘yinlik tarix emas, butun bir epoxa.
Endi eng qizig‘i — agar bu xabarlar tasdiqlansa, Simeone uchun bu yangi chaqiriq bo‘ladi: Milandagi “Inter”da u qanday uslub quradi, “Atletiko” esa kim bilan yangi yo‘lga chiqadi. Mavsum oxirigacha intriga yetarli — “futbol seriali”ning yangi seriyasi tayyor.
“Zamin”ni Telegramʻda oʻqing!
