Ispaniya La Ligasining 27 turi doirasida "Valensiya" o'z maydonida "Alaves" jamoasini qabul qildi. Uchrashuv kutilmagan voqealarga boy tarzda o'tdi va mezbonlarning irodali g'alabasi bilan yakunlandi. O'yin boshida "Alaves" futbolchisi Lukas Boye 3 daqiqada penaltini aniq amalga oshirib, hisobni ochdi. Uchrashuvning 71 daqiqasida yana bir bor raqib darvozasini ishg'ol qilgan Boye jamoasini qulay ustunlikka olib chiqdi.
O'yin yakuniga yaqinlashganda "Valensiya" futbolchilari haqiqiy matonat ko'rsatishdi. 47 daqiqada Xavi Gerra hisobni qisqartirgan bo'lsa, 90 daqiqada Eray Jomert muvozanatni tikladi. Hakam tomonidan qo'shib berilgan 9 daqiqada esa Ugo Duro penaltidan unumli foydalanib, jamoasiga qiyin g'alabani taqdim etdi. O'yin so'ngida hissiyotlar avj olib, hakam "Alaves" futbolchilari Xon Pacheko va Ander Gevarani qizil kartochka bilan maydondan chetlatdi.
Statistik ko'rsatkichlarga ko'ra "Valensiya" 18 ta zarba yo'llab, to'pga egalik qilish bo'yicha ham ustunlik qildi. Ushbu g'alabadan so'ng "Valensiya" 32 ochko bilan turnir jadvalining 12 pog'onasiga ko'tarildi. "Alaves" esa 27 ochko bilan 16 o'rinda qoldi. Ayni damda "Barselona" 67 ochko bilan peshqadamlik qilayotgan bo'lsa, "Real Madrid" 63 ochko bilan ikkinchi o'rinda bormoqda. Bu g'alaba "ko'rshapalaklar" uchun mavsumdagi eng muhim natijalardan biri bo'ldi.
“Zamin”ni Telegramʻda oʻqing!
