O‘zbekiston Superligasining 3-turida Navoiy shahrida muhim bellashuv bo‘lib o‘tdi. «Mash’al» bu safar «Qizilqum»ga qarshi maydonga tushdi, ammo uchrashuv mezbonlar uchun yana bir alamli kechaga aylandi. «Oltin izlovchilar» tartibli o‘yin, sovuqqonlik va samaradorlik hisobiga 2:0 hisobida g‘alabani qo‘lga kiritdi.
Bahsning birinchi bo‘limida jamoalar o‘zaro kurashni qattiq ushladi. «Mash’al» o‘yin sur’atini ushlashga, hujumda faolroq ko‘rinish berishga harakat qildi, ammo «Qizilqum» himoyada juda saranjom va intizomli o‘ynadi. Eng muhimi — navoiyliklar o‘z imkoniyatini golga aylantira oldi: 39-daqiqada Jambuli Jigauri hisobni ochib, o‘yin yo‘nalishini mehmonlar foydasiga burib yubordi — 0:1.
Ikkinchi taymda «Mash’al» hisobni qutqarish uchun oldinga chiqdi, o‘yinda bosimni oshirdi. Lekin bu ochiq zonalar qoldirdi va «Qizilqum» buni oqilona nazorat qildi. Uchrashuvning oxirgi daqiqalarida, 90-daqiqada Shohruz Norxonov nuqtani qo‘ydi — 0:2. Shu gol «Qizilqum»ning g‘alabasini to‘liq rasmiylashtirib berdi.
Natijada Akmal Rustamov boshqaruvidagi «Qizilqum» ochkolari sonini 6 taga yetkazdi va turnirdagi pozitsiyasini ancha mustahkamladi. «Mash’al» esa hali ham ochko jamg‘ara olmay, uch turdan keyin “nol” bilan qolmoqda — bu albatta jamoa uchun jiddiy signal.
Superliga. 3-tur
Mash’al – Qizilqum 0:2
Gollar: Jambuli Jigauri 39, Shohruz Norxornov 90.
Mash’al: Dostonbek To‘xtaboyev, Zafar Akramov, Samandar Ochilov, Vlatko Stoyanovskiy, Ibrohim G‘anixonov, Humoyun Murtozayev, Nuriddin Nuridinov, Muhammadali Aliqulov, Nurjahon Muzaffarov, Ergash Ismoilov, Sherzod Fayziyev.
Qizilqum: Farhod Raxmatov, Ilxomjon Vaxobov, Shaxzodbek Raxmatullayev, Islom Kenjaboyev, Shebetun Oleksiy (Shohruz Norxonov, 61), Nikola Kumborovich, Asror G‘ofurov (G‘iyos Rizaqulov, 86), Bobomurod Bozorov, Samandar Shukurillayev, Jambuli Jigauri (Shahzod Turopov, 81), Diyor Raxmatilloyev (Alisher Shukurov, 86).
“Zamin”ni Telegramʻda oʻqing!
