9 may kuni Nyu‑Jersida aralash jang san’atining yirik musobaqalaridan biri — UFC 328 turniri bo‘lib o‘tadi. Mazkur kecha jahon MMA muxlislari uchun bir qator qiziqarli va keskin to‘qnashuvlar bilan esda qolishi kutilmoqda. Turnir doirasida bir nechta mashhur jangchilar oktagonga chiqib, o‘z mahorati va kuchini namoyish etadi.
Kechaning eng asosiy jangida o‘rta vazn toifasidagi amaldagi chempion Xamzat Chimayev o‘z kamarini himoya qiladi. U amerikalik tajribali jangchi Shon Striklendga qarshi oktagonga chiqadi. Bu to‘qnashuv Chimayev uchun chempionlik kamarini ilk bor himoya qilish jangidir. Shu bois ushbu bellashuv turnirning eng kutilgan va markaziy jangi sifatida baholanmoqda.
Kechaning ikkinchi eng muhim — “co-main event” janglaridan birida og‘ir vazn vakillari Aleksandr Volkov hamda Valdo Kortez Akosta o‘zaro kuch sinashadi. Ikki jangchi ham o‘z divizionida yuqori o‘rinlar uchun kurashayotgani sababli bu to‘qnashuv ham muxlislar uchun alohida qiziqish uyg‘otmoqda.
O‘zbekistonlik muxlislar uchun eng katta intriga esa hamyurtimiz Bogdan Guskovning ishtiroki bilan bog‘liq. U yengil og‘ir vazn toifasida mashhur polshalik jangchi Yan Blaxovichga qarshi oktagonga ko‘tariladi. Bu jang Guskov uchun karerasidagi muhim sinovlardan biri bo‘lishi mumkin.
Shuningdek, turnir doirasida yana bir qiziqarli qarama-qarshilik — ikki amerikalik jangchi Shon Bredi va Xoakin Bakli o‘rtasida bo‘lib o‘tadi. Ularning jang uslubi va agressiv taktikasi sabab bu to‘qnashuv ham tomoshabinlar uchun juda qiziq bo‘lishi kutilmoqda.
Bundan tashqari, asosiy kardda yana bir nechta janglar rejalashtirilgan. Jumladan, King Grin amerikalik Jeremi Stivensga qarshi bahs olib boradi. Shuningdek, o‘rta vaznda Ateba Gote va Ozzi Dias o‘rtasidagi to‘qnashuv ham dasturdan joy olgan.
Qisqasi, UFC 328 turniri jang san’ati muxlislari uchun haqiqiy sport bayramiga aylanishi kutilmoqda. Ayniqsa, o‘zbekistonlik muxlislar Bogdan Guskovning chiqishini katta qiziqish bilan kutishmoqda. Bu jang uning xalqaro arenadagi mavqeini yanada mustahkamlashi mumkin.
“Zamin”ni Telegramʻda oʻqing!
